Мақомоти иҷроияи ҳокимияти давлатии шаҳри Душанбе аз шаҳрвандон ва истифодабарандагони шабакаҳои иҷтимоӣ даъват  намуд, ки ба саҳифаҳои қалбакии аз номи Раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе Рустами Эмомалӣ кушодашуда ба истилоҳ «фейкҳо» бовар накунанд.

Барои ҳалли мушкилоту ниёзмандиҳо, муроҷиат ва дархостҳо шаҳрвандон метавонанд ба почтаҳои электронии Маҷлиси миллии Маҷлиси Олӣ majmilli@rs.tj, Мақомоти иҷроияи ҳокимияти давлатии шаҳри Душанбе dushanbe80@yahoo.com, сомона ва саҳифаҳои расмии www.dushanbe.tj, дар Инстаграм:  dushanbe_official, ба вайбери Мақомоти иҷроияи ҳокимияти давлатии шаҳри Душанбе (985-95-22-22) нависанд.

 

 

Мулоқоти Раҷаббой Аҳмадзода бо Ли Яохуэй

Раиси вилояти Суғд Раҷаббой Аҳмадзода бо директори генералии Ширкати кӯҳӣ-саноатии Тоҷикистону Хитой Ли Яохуэй вохӯрд. Дар суҳбат таъкид гардид, ки Ширкати кӯҳӣ-саноатии Тоҷикистону Хитой аз калонтарин корхонаҳои ҷумҳурӣ ба ҳисоб рафта, дар нуҳ моҳи соли ҷорӣ ба маблағи 2 миллиарду 779,9 миллион сомонӣ маҳсулот истеҳсол кард. Аз ҷумла, 60,8 ҳазор тонна консентрати сурб ва 94,5 ҳазор тонна консентрати руҳ.

Ба иттилои хадамоти матбуоти раиси вилоят, саҳми корхона дар ободии маҳал низ назаррас буда, бо 75 миллион сомонӣ маблағгузории ширкат роҳи автомобилгарди Зарнисор – Бӯстон ба масофаи 38 км мумфарш гардида истодааст. Ҳамзамон, корхона аз ҳисоби даромадҳояш дар шаҳри Истиқлол як кӯдакистони замонавӣ бунёд намуд.

 

 

100-солагии Меҳрубон Назаров таҷлил гардид

Дар Театри мусиқию мазҳакавии шаҳри Хоруғ бахшида ба 100-солагии арбоби сиёсию давлатӣ, Ходими хизматнишондодаи санъати Тоҷикистон, профессор Меҳрубон Назаров чорабинии хотирмони фарҳангӣ доир гашт. Дар чорабинӣ раиси Вилояти Мухтори Кӯҳистони Бадахшон Мирзонабот Алишер Худобердӣ, аҳли фарҳангу санъат, ҳамкорон, дӯстон ва наздикони ин арбоби давлатӣ иштирок намуданд. 

Мирзонабот Алишер Худобердӣ ҳозиронро бо 100-солагии устоди зиндаёд табрику таҳният гуфта, зикр кард, ки аз хотироти арбобони илму фарҳанг, дӯстон ва наздикон бармало намоён аст, ки Меҳрубон Назаров шахсияти бисёрҳирфа, дорои истеъдод ва маҳорату малакаи баланди касбӣ буда, дар оинаи фаъолият ва ҳаёти фардии он шахс як марҳилаи бузурги таърихи давраи шуравии миллати тоҷик инъикос гардидааст.

Бо ибтикори Сарвари давлат дар шаҳри Хоруғ бинои муҳташами Театри мусиқӣ-мазҳакавӣ, ки қадамҳои нахустину устувори худро ба арсаи фарҳангу санъат устод маҳз аз остони ин муассисаи бонуфуз гузошта буд, бо тарҳи зебою замонавӣ бунёд гардид ва дар пештоқи он номи Меҳрубон Назаров бо ҳарфҳои зарҳалӣ ҳаккокӣ шудааст.

Сипас, намоишномае аз ҳаёти Меҳрубон Назаров ва мусоҳибаи телевизионии соҳибҷашн ба ҳозирон пешниҳод шуданд. Чорабинӣ бо баромади консертии фарзанди соҳибҷашн Далер Назаров анҷом пазируфт.