Вазири маориф ва илми Ҷумҳурии Тоҷикистон Саидзода Раҳим Ҳамро бо сафари корӣ ба вилояти Суғд ташриф овард. Зимни сафар аз муассисаҳои таҳсилоти миёнаи умумии осебдида дар низоъҳои наздисарҳадии шаҳри Исфара ва ноҳияи Бобоҷон Ғафуров дидан карда, бо осебдидагону зарардидагон ва наздикони фавтидагон мулоқот анҷом дод. Ба онҳо, аз ҷумла ба оилаҳои омӯзгорон, ёрии молию пулӣ расонда шуд.

Инчунин, аз вазъи таълиму тарбия, корҳои ободонӣ, таъмиру тармими муассисаҳо ва омодагӣ ба зимистонгузаронӣ аз Муассисаи таълимии рақами 24 ба номи Чӯлибой Комилови деҳаи Оби Зулоли шаҳри Истаравшан низ, дидан намуд. Зимни боздид якчанд камбудии ислоҳталаб ошкор гардиданд. Аз ҷумла, яке аз онҳо ба талабот ҷавобгӯ набудани ангиштсанги харидоришуда барои зимистонгузаронӣ буд. Муассисаи таълимии мазкур ба миқдори 13 тонна ангиштсанг харидааст, ки,  аксаран, ангиштсанги хока аст. 

Вазири маориф ва илм ба ин камбудии ҷиддӣ сахт эрод гирифта, ба масъулон, махсусан ба сардори раёсати маорифи шаҳри Истаравшан Гулрӯ Пӯлотова супориш дод, ки дар муддати кӯтоҳтарин камбудии ҷойдоштаро дар муассисаи болозикр ислоҳ намуда, хаттӣ маълумотнома пешниҳод намоянд. 

Аммо масъулон баъди ин супориш ҷиҳати бартараф намудани камбудӣ чора наандешиданд. Ин дар суратест, ки ба унвони вазири маориф ва илм маълумотномаи бардурӯғ пешниҳод шудааст. 

Бояд гуфт, ки Муассисаи зикршуда дуошёна ва аз плитаҳои бетонист, ки аз 20 синфхона иборат мебошад. Саволе ба миён меояд, ки оё ба ангиштсанги хокаи харидашуда синфхонаҳои барҳаво ё ин ки калонҳаҷми онро гарм кардан мумкин аст? Албатта, не.

Хулоса, фикр мекунем, ки баъди ба нашр расидани маводи мазкур масъалаи ҷойдоштаи Муассисаи таълимии рақами 24-и шаҳри Истаравшан ҳалли худро хоҳад ёфт. 

 

Сомон СИПЕҲРӢ,

шаҳри Истаравшан