Дар Маркази тадқиқоти стратегии назди Президенти Ҷумҳурии Тоҷикистон бо мақсади арзёбии масъалаҳои стратегии рушди иқтисодиву иҷтимоии кишвар дар мавзуи «Саноатикунонии босуръати иқтисодиёти Ҷумҳурии Тоҷикистон – роҳи асосии таъмини рушди устувор» конфронси илмӣ-амалӣ баргузор гардид. Дар он намояндагони вазорату идораҳои дахлдор, марказу пажӯҳишгоҳҳои илмӣ, муассисаҳои таҳсилоти олии касбӣ ва коршиносони соҳа ширкат варзиданд.

Хайриддин Усмонзода, директори Маркази тадқиқоти стратегӣ, изҳор дошт, ки ҷомеаи имрӯзаи Тоҷикистон бо пешниҳоди стратегияи ҷаҳоруми худ таҳти унвони "Саноатикунонии босуръат ба хотири таъмини зиндагии шоистаи мардум" вориди марҳалаи ҷадиди навсозӣ гардид. Ташаббуси чунин навсозии ҷомеа омили рушди иқтисодӣ ва беҳбудии зиндагии мардум дониста мешавад. 

Пешниҳоди тарҳи саноатикунонии босуръати кишварро Президенти мамлакат дар Паёми худ ба Маҷлиси Олии Ҷумҳурии Тоҷикистон бо назардошти аҳамияти соҳаи саноат дар ҳалли масъалаҳои иқтисодиву иҷтимоӣ ва таъсиси ҷойҳои нави корӣ, коҳишёбии сатҳи камбизоатӣ ҳамчун ҳадафи чаҳоруми стратегӣ эълон карда буданд. Барои ба воқеият пайвастани ин ҳадаф, амалисозии босифати барномаҳои соҳавии қабулгардида, ҷалби васеи лоиҳаҳои сармоягузорӣ, бунёди корхонаҳои нави истеҳсолӣ зарур дониста мешавад. Бо ин мақсад, айни замон баҳри татбиқи Стратегияи рушди саноат дар Ҷумҳурии Тоҷикистон барои давраи то соли 2030 як қатор барномаҳои соҳавӣ амалӣ шуда истодаанд, ки мақсадашон фароҳамоварии шароит барои гузариши иқтисодиёти кишвар аз шакли тавлидкунандаи ашёи хом ба истеҳсолкунандаи маҳсулоти ниҳоӣ мебошад. Бо татбиқи чунин амалҳо солҳои охир дар саноати  мамлакатамон тамоюли мусбати рушд нигоҳ дошта шуда, дар самтҳои алоҳидаи он суръати афзоиши тавлиди молу хизматрасониҳо таъмин гардид.  

Дар баробари ин, саноатикунонӣ таъмини мавҷудияти як силсила шарту шароитеро дорад, ки аз ҷумлаи муҳимтарини онҳо ба вуҷуд овардани муҳити мусоид барои ҷалби сармоягузорӣ, навовариҳо дар фаъолияти ниҳодҳои хоҷагидорӣ, воридсозии густурдаи мардум, аз ҷумла занон, ба бозори кор ва ҳузури онҳо дар дигар соҳаҳои ҳаёти ҷамъиятӣ ба иқтисоди навоварона ва ғайра, маҳсуб меёбад. 

Барои таъмини ниёзҳои рушди саноатии ҷомеа бояд дар самти коркарди захираҳои табиӣ талоши бештар сурат гирад. Шароити зикршуда ба назари коршиносон бисёр муҳим аст. Заминаҳо барои барқарор кардани истеҳсолот дар Тоҷикистон вобаста ба афзоиши солонаи истеҳсоли барқ вуҷуд доранд ва дар Барномаи саноатикунонии мамлакат барои солҳои 2020-2025 банди алоҳида таҳти унвони “Таъмини соҳаи саноат бо энергияи барқ” ҷой дорад. 

– Дар ин раванд пешбинӣ мегардад, ки соҳибкории хурду миёна ба ҷузъи муҳими фарҳанги иқтисодии ҷомеа табдил ёфта, ба ҳадафи асосии сиёсати иқтисодии давлат табдил дода мешавад. Дастгирию таъмини малакаҳои касбии мардум дар фаъолияти сохторҳои шуғлтаъминкунию молиявӣ афзалият пайдо мекунанд. Боварии комил дорем, ки олимону мутахассисони дар ин нишаст ширкатдошта равандҳои гуногуни саноатикунонии кишварамонро аз лиҳози инноватсионӣ таҳлилу таҳқиқ намуда, тавсияҳои муфид пешниҳод менамоянд, – гуфт Хайриддин Усмонзода. 

Таъкид гардид, ки ҳадаф аз ҳамоиш арзёбии вазъи кунунӣ ва корбурди тавсияҳои амалӣ доир ба рушди равандҳои навсозии технологияи инноватсионӣ дар соҳаи саноати Ҷумҳурии Тоҷикистон ва таҳқиқи инкишофи равандҳои технологияи инноватсионӣ дар соҳаи саноат буда, он барои татбиқи ҳамаҷонибаи сиёсати давлатӣ дар самти саноатикунонии босуръати иқтисодиёти кишвар мусоидат хоҳад кард.

 

З. РАҶАБ, 

“Ҷумҳурият”