Тарбияи ватандӯстии шаҳрвандон, хусусан дар вазъи тарғйирёбандаи ҷаҳон ва хусусияти устувор пайдо кардани зуҳуроти хатарноки замони муосир, аз ҷумла экстремизму терроризм ва дигар ҷиноятҳои фаромиллӣ, таассуби динӣ, бегонапарастӣ, дахолати неруҳои бадхоҳ ба корҳои дохилии кишварамон, ки башариятро ба ташвиш овардааст, аҳамияти бештар касб менамояд. Аз ин хотир, вусъат бахшидани корҳои ватандӯстии шаҳрвандон ва танзими ҳуқуқии он хеле зарур ва саривақтӣ арзёбӣ мегардад. Дар сатҳи қонун таҷассум ёфтани мафҳуми тарбияи ватандӯстӣ, ба тақвият ёфтани масъулиятшиносии ҳар як шаҳрванд дар назди Ватан, тавсияи мавзуи хештаншиносӣ дар ҷомеа ва ташаккули насли наврасу меҳнатдӯст заминаҳои марбутаи ҳуқуқиро фароҳам меорад.

Ин нуктаро Дилшод Раҳмон, раиси Кумитаи Маҷлиси миллӣ оид ба таъминоти асосҳои конститутсионии ҳуқуқу озодиҳои инсон, шаҳрванд ва қонуният, зимни муаррифӣ ва баррасии лоиҳаи Қонуни Ҷумҳурии Тоҷикистон “Дар бораи тарбияи ватандӯстии шаҳрвандон” дар Маҷлиси намояндагон иброз дошт. 

Лоиҳаи Қонуни Ҷумҳурии Тоҷикистон “Дар бораи тарбияи ватандӯстии шаҳрвандон” мутобиқи муқаррароти моддаи 58 Конститутсияи кишвар, бо мақсади такмили қонунгузорӣ ва танзими меъёрии ҳуқуқии фаъолият дар самти тарбияи ватандӯстии шаҳрвандон бо истифода аз ҳуқуқи ташаббуси қонунгузорӣ аз ҷониби Раиси Маҷлиси миллии Маҷлиси Олӣ Рустами Эмомалӣ таҳия ва пешниҳод гардидааст. 

Ба таъбири Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, тарбияи шаҳрвандон, бахусус кӯдакону наврасон ва ҷавонон, дар руҳияи гиромидошти арзишҳои суннативу башарӣ, дӯст доштани Ватани азизу маҳбуб вазифаи аввалиндараҷаи давлат, ҷомеа ва оила мебошад.

– Қабули Қонуни мазкур тақозои замон ва талаботи рӯз аст. Он ба таҳкими ҳисси муҳаббат ба Ватан, ватанпарастӣ худшиносию, ҳувияти миллии шаҳрвандон мусоидат намуда, масъулияти мақомоти давлатию ҷамъиятӣ ва шаҳрвандонро дар рушду инкишофи кишвар, ҳифзи манфиатҳои миллию давлатӣ баланд мебардорад. Инчунин, барои ташаккули заминаҳои меъёрии ҳуқуқии самти тарбияи ватандӯстӣ, ҷабҳаҳои фарҳангӣ, маънавию сиёсӣ ва маърифати ҳуқуқии шаҳрвандон, коҳиш додани сатҳи ҷинояткорӣ дар ҷомеа, бахусус дар байни наврасону ҷавонон, имкониятҳои нав ба вуҷуд меорад, – таъкид кард Дилшод Раҳмон. 

Маҳмадтоир Зокирзода, Раиси Маҷлиси намояндагон, иброз дошт, ки ин санад ҳадаф, принсипҳои тарбияи ватандӯстӣ, асосҳои ҳуқуқӣ ва ташкилии онро муқаррар карда, муносибатҳои вобаста ба ташкили заминаҳои ҳуқуқӣ, иҷтимоӣ, иқтисодӣ, таъмин ва танзими фаъолиятро дар соҳаи тарбияи ватандӯстии шаҳрвандон муайян менамояд. Ҳамчунин, арзишҳои муҳими иҷтимоӣ ва маънавию ахлоқӣ, тақвият додани заминаҳои ҳисси шаҳрвандӣ ва ватандӯстӣ дар ҷомеа, ташаккул ва рушди сифатҳои неки иҷтимоии насли наврас ва қобилияти аз ҷониби онҳо зоҳир намудани ин сифатҳо дар раванди бунёдкориҳо ба нафъи ҷомеа ва давлат заминаи мусоидаткунанда фароҳам меоварад. 

 

Маҳмуд МИРЗОЁН, “Ҷумҳурият”