Равандҳои сиёсӣ, иқтисодӣ, иҷтимоию фарҳангӣ тавсеаи муносибатҳои байналмилалии Ҷумҳурии Тоҷикистонро дар зарфи 30 соли Истиқлоли давлатӣ бе талошу заҳматҳои Сарвари давлат муҳтарам Эмомалӣ Раҳмон тасаввур кардан ғайриимкон мебошад, зеро маҳз ҷасорати бемисл, эҳсоси баланди ватандориву ватандўстӣ, дарки амиқи манфиатҳои миллӣ аз ҷониби Пешвои муаззами миллат буд, ки давлати мо дар оғози Истиқлоли давлатӣ аз хатари фаношавӣ раҳо шуда, имрўз ба дастовардҳои беназири иқтисодию иҷтимоӣ мушарраф гардид ва дар арсаи байналмилалӣ мақоми баланди сиёсӣ ба даст овард.

Таҷлили бошукўҳи Ҷашни 30-солагии Истиқлоли давлатӣ бори дигар комёбию муваффақиятҳои Ҷумҳурии Тоҷикистонро зери роҳбарии хирадмандонаи Пешвои миллат муҳтарам Эмомалӣ Раҳмон бозгў намуд.

Дар шумори дастовардҳои беназири давлату миллати тоҷик дар даврони соҳибистиқлолӣ ва шоҳкориҳои Сарвари давлат қабули Конститутсияи Ҷумҳурии Тоҷикистон мавқеи хосса дорад. Пешвои муаззами миллат ба аҳамияти таърихиву сиёсии қабули Конститутсия ишора карда, ҳанўз соли 2014 дар Паёми худ ба Маҷлиси Олӣ чунин зикр карданд: «Конститутсия барои аз байн бурдани хатаре, ки ба Истиқлолияти давлатӣ таҳдид мекард, шароити зарурии ҳуқуқӣ муҳайё карда, барои аз нобудӣ наҷот додани давлати тозаистиқлоли тоҷикон ва аз парокандагӣ раҳоӣ бахшидани миллати тоҷик асос гузошт, ҷиҳати расидан ба ваҳдати миллӣ таҳкурсии устувор гардид ва дар он марҳалаи ҳассоси таърихӣ барои гузоштани асосҳои аркони давлатдории тоҷикон нақши тақдирсозу ҳалкунанда бозид».

Аз таърихи оғози давлатдории навини тоҷикон ба мо маълум аст, ки дар Иҷлосияи таърихии XVI Шурои Олии Ҷумҳурии Тоҷикистон дар баробари баррасии 74 масъалаи ҳаётан муҳим, аз ҷониби Сарвари давлат муҳтарам Эмомалӣ Раҳмон оид ба таҳия, муҳокима ва қабули Конститутсияи нав аҳамияти ҷиддӣ дода шуд, зеро Роҳбари давлат заминаи бунёди давлати ҳуқуқбунёд, демократӣ ва дунявиро маҳз бо Конститутсияи кишвар алоқаманд медонистанд. Ин буд, ки дар асоси Қарори Иҷлосияи XVI Шурои Олӣ «Дар хусуси ворид намудани тағйиру иловаҳо ба Қарори Шурои Олии Ҷумҳурии Тоҷикистон аз 23 августи соли 1990 «Дар бораи ташкили комиссия оид ба тайёр намудани Конститутсияи (Қонуни асосии) Ҷумҳурии Тоҷикистон” Комиссияи махсус оид ба таҳияи лоиҳаи Конститутсия таъсис дода шуд.

Комиссияи конститутсионӣ таҳти роҳбарии Эмомалӣ Раҳмон конститутсияеро таҳия ва қабул намуд, ки он аз ҷониби як зумра мутахассисони кишварҳои ҷаҳон, аз ҷумла Иёлоти Муттаҳидаи Амрико, Бритониёи Кабир, Россия ва чанд кишвари дигар баҳои сазовор гирифт. Коршиносони Созмони Милали Муттаҳид, Шурои амният ва ҳамкории Аврупо ва созмонҳои дигари байналмилалӣ низ ба Конститутсияи Ҷумҳурии Тоҷикистон баҳои баланд доданд.

Ҳоло 28 соли амали Конститутсияи Ҷумҳурии Тоҷикистон аз он шаҳодат медиҳад, ки Комиссияи конститутсионӣ ва гурўҳи корӣ дар қабули ҳуҷҷати сарнавиштсози миллати худ маҳорати баланди касбӣ ва масъулияти олии шаҳрвандию инсонӣ нишон дода, бо такя ба анъанаҳои таърихии гузаштагони худ ва таҷрибаи ҷаҳонии қабули конститутсияҳо, арзишҳои умумиэътирофшудаи байналмилалӣ ва арзишҳои миллӣ як Конститутсияи мукаммал, пурмазмун, фаҳмо, одӣ ва бо шеваи нобу равони тоҷикӣ таҳияшударо рўи кор оварданд, ки ин санад бо танзими масъалаҳои бунёдии худ бахтномаи миллати мо гардида, барои рушду таҳкими давлатдориву давлатсозии халқи тоҷик заминаи мусоиди сиёсиву иҷтимоӣ фароҳам овард.

 

Карим КАРИМЗОДА, муовини раиси Суди конститутсионии Ҷумҳурии Тоҷикистон, номзади илмҳои сиёсӣ