7 ноябр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Шарм-уш-Шайхи Ҷумҳурии Арабии Миср дар маросими ифтитоҳи Павилйони Тоҷикистон дар ҳошияи Конфронси 27-уми тарафҳои Конвенсияи Созмони Милали Муттаҳид оид ба тағйирёбии иқлим (КОП - 27) иштирок ва суханронӣ карданд.

Дар маросими ифтитоҳи Павилйони Тоҷикистон, ҳамчунин, директори иҷроияи Фонди иқлими сабз Яник Глемарик, президенти Фонди байналмилалии рушди кишоварзӣ Алваро Ларио, Котиби генералии Созмони ҷаҳонии ҳавошиносӣ Петтери Таалас ва намояндагони дигар кишварҳову созмонҳо иштирок карданд.

Павилйони Тоҷикистон дар ҳошияи Конфронс аз 7 то 18 ноябр дар шаҳри Шарм-уш-Шайх бо мақсади муаррифӣ ва пешниҳоди ташаббусҳои глобалии Президенти Ҷумҳурии Тоҷикистон муҳтарам Эмомалӣ Раҳмон оид ба масъалаҳои тағйирёбии иқлим, ҳифзи пиряхҳо ва захираҳои об, ҷалби таваҷҷуҳи ҷомеаи ҷаҳонӣ ба осебпазирии баланди ҷумҳурӣ ба пайомадҳои тағйирёбии иқлим, афзудани бештари сармоягузорӣ барои мутобиқ гардондани соҳаҳои калидии иқтисодиёти кишвар ба тағйирёбии иқлим ва тақвияти ҳамкориҳои минтақавӣ ва байналмилалӣ оид ба масъалаҳои тағйирёбии иқлим ташкил гардидааст.

Бояд  гуфт,  ки  Тоҷикистон  Конвенсияи  Созмони Милали  Муттаҳид оид ба тағйирёбии иқлимро соли 1998 ва Созишномаи Парижро соли 2017 тасдиқ кардааст.

Тибқи муқаррароти қабулгардида, Конфронси тарафҳои Конвенсияи мазкур дар як сол як маротиба бо иштироки сарварони давлатҳо ва ҳайати васеи намояндагони кишварҳои аъзо, роҳбарони созмонҳои байналмилалӣ, минтақавӣ, ҷомеаи шаҳрвандӣ ва дигар тарафҳои ҳавасманд баргузор мегардад.

Инчунин, дар ҳошияи Конфронс бо мақсади муаррифии сиёсати пешгирифтаи давлатҳои аъзо дар самти иҷрои уҳдадориҳо дар назди Конвенсия баргузории чорабиниҳои канорӣ, ҳамоишҳо ва вохӯриҳо, павилйонҳо ташкил мешаванд.