Дар асоси Қонуни Ҷумҳурии Тоҷикистон «Дар бораи рӯзҳои ид» иди касбии кормандони милитсия 10 ноябр муқаррар шудааст. Ин сана аз ҷиҳати илмиву таърихӣ исбот шудааст ва санадҳои таърихие, ки имрӯз мавҷуданд аз ин гувоҳӣ медиҳанд. Далелҳои муътамад гувоҳи онанд, ки ҳанӯз дар давраи Инқилоби Октябр дар қисмати шимолии Тоҷикистони имрӯза нахустин дастаҳои милитсия созмон ёфта буданд.

 

Асоси ҳуқуқии таъсисёбии милитсияро дар гӯшаву канори собиқ империяи Россия, ки қаламрави Тоҷикисони кунунӣ низ ба он дохил мешуд, Декрет «Дар бораи милитсияи коргарӣ», ки 10 ноябри соли 1917 ба тасвиб расонда буд, ташкил медиҳад. Бинобар ин, 10 ноябр ҷашн гирифтани Рӯзи милитсияи тоҷик аз ҷиҳати таърихӣ ва илмӣ воқеан дуруст мебошад.

Мақомоти милитсия тибқи таъиноти худ ҳамеша вазифаҳои мураккабу муҳими давлатиро дар самти таъмини тартиботи ҳуқуқӣ ва таҳкими қонуният ба сомон мерасонанд.

Баъди ба даст омадани Истиқлоли давлатӣ милитсияи тоҷик ҳамеша дар сафи пеши мубориза бо унсурҳои ҷинояткор, ки халалдор намудани ҳаёти осоиштаи сокинони мамлакат, поймол намудани ҳуқуқ ва озодиҳои инсон, инчунин, заиф гардондани пояҳои давлатдориро мехостанд, қарор гирифта буд.

Ҳодисаҳои маълуми солҳои 90-ум ва ҷанги фалокатбори таҳмилӣ пешорӯи шарафу мардонагӣ ва садоқату шуҷоатмандии милитсияи тоҷик имтиҳони навбатиро гузошт. Он солҳо мақомоти милитсия дар ҳамбастагӣ бо дигар сохторҳои ҳифзи ҳуқуқ барои таъмини оромиву осоиштагии ҷомеа, барқарор намудани сохти конститутсионии давлат ва ҳимояи ҳаёти осудаи сокинони мамлакат камар баста, дар ҷараёни он садҳо нафар кормандони милитсия ҷони худро аз даст доданд.

Вазорати корҳои дохилии Ҷумҳурии Тоҷикистон яке аз ниҳодҳои калидии мақомоти ҳифзи ҳуқуқи кишвар ба шумор рафта, ҳимояи ҳаёт ва саломатӣ, ҳуқуқу озодиҳои инсон ва шаҳрвандон аз кирдорҳои ғайриқонунӣ, пешгирии ҷинояткорӣ ва дигар ҳуқуқвайронкуниҳо, ҳимояи манфиатҳои ҷамъиятию давлатӣ, таъмини тартиботу бехатарии ҷамъиятӣ, ошкор намудан, таҳқиқу тафтиши ҷиноятҳо, ҷустуҷӯи шахсоне, ки ҷиноят содир кардаанд, ҳимояи ҳама гуна шакли моликият аз кирдорҳои ғайриқонунӣ аз самтҳои асосии фаъолияти ин мақомот ба шумор мераванд.

Тавре Пешвои миллат дар муроҷиат ба кормандони милитсия зикр кардаанд: «Ҳеҷ кас мисли шумо дар ҷабҳаи ҳимояи ҳуқуқу озодиҳои шаҳрвандон чунин ваколат надорад ва ҳеҷ яке аз мақомоти ҳифзи ҳуқуқ мисли шумо бо халқ наздик нест. Ман ба ақлу заковат, донишу маҳорат, поквиҷдонӣ, ватандӯстиву меҳанпарастии ҳар кадоми шумо бовар дорам ва мутмаинам, ки минбаъд низ аз иҷрои вазифа ва супоришҳое, ки давлату халқи Тоҷикистон дар назди шумо гузоштаанд, сарбаландона мебароед. Доимо дар хотир дошта бошед, ки шумо симо ва оинаи давлат ҳастед ва халқ ба шумо аз ҳамин нуқтаи назар баҳо медиҳад. Аз ин рӯ, кӯшиш кунед, ки ба ин боварӣ сазовор бошед».

Имрӯз шароите, ки барои кормандони мақомоти милитсия аз ҷониби Ҳукумати мамлакат фароҳам оварда шудаанд, моро водор месозад, ки дар иҷрои вазифаҳои хизматӣ, аз ҷумла ҳифзи тартиботи ҷамъиятӣ, мубориза бо зуҳуроти хатарноки замони муосир, дар маҷмуъ, таъмини зиндагии шоистаи мардум ва Ватани азизамон – Тоҷикистон масъулияти бештар дошта бошем.

 

Илҳом СУЛТОНОВ, 

муаллими калони Сикл оид ба омодагии 

ҳуқуқи Маркази таълимии ВКД Ҷумҳурии Тоҷикистон, 

подполковники милитсия