Конститутсия ҳамчун санади сиёсию ҳуқуқӣ Тоҷикистонро давлати соҳибихтиёр, демократӣ, ҳуқуқбунёд, дунявӣ ва ягона эълон намуда, ба рушди минбаъдаи асосҳои сохтори конститутсионӣ, таъмини ҳифзи ҳуқуқу озодиҳои инсон ва шаҳрванд, фаъолияти боэътимоди мақомоти олии кишвар ва таҳкими дигар ниҳодҳои ҷомеаи демократию шаҳрвандӣ шароити зарурӣ фароҳам овардааст. Ин санади олии ҳуқуқӣ дар баробари танзими дигар масъалаҳои муҳими давлатӣ, инчунин, ба ташаккул, рушд ва мустаҳкам намудани низоми ҳуқуқӣ низ роҳи васеъ кушодааст. 

Ин нуктаро Музаффар Ашуриён, вазири адлия, зимни Форуми ҳаштуми миллӣ оид ба волоияти қонун, ки бахшида ба Рӯзи Конститутсияи Ҷумҳурии Тоҷикистон дар Китобхонаи миллии Тоҷикистон баргузор гашт, - иброз дошт. Дар кори форум мушовири бахши ёрдамчии Президенти Ҷумҳурии Тоҷикистон оид ба масъалаҳои ҳуқуқӣ Сайфиддин Сироҷзода, аъзои Маҷлиси миллӣ, вакилони Маҷлиси намояндагон, узви созмонҳои байналмилалӣ, ҷомеаи шаҳрвандӣ ва коршиносон ширкат доштанд. 

- Таъмини волоияти қонун яке аз масъалаҳои рӯзмарра ба ҳисоб рафта, бо назардошти таҳдидҳои нави ҷаҳонӣ ислоҳоти ҳуқуқиро дар ҷомеа тақозо менамояд. Баланд бардоштани дониши касбию маърифати ҳуқуқии шаҳрвандон кафили эҳтиром, риоя ва иҷрои Конститутсия, қонунҳою дигар санадҳои меъёрии ҳуқуқӣ мебошад. Ба андешаи мо, ҳамаи комёбиҳо дар ҷодаи таҳкими волоияти қонун аз қабули Конститутсия сарчашма мегирад. Бо мақсади татбиқи меъёрҳои ин санади олии ҳуқуқӣ як қатор санадҳои меъёрии ҳуқуқӣ, барномаҳою стратегия, консепсияву нақшаи чорабиниҳо қабул гардида, баҳри амалисозии ҳадафҳои рушди давлат, эъмори ҷомеаи ҳуқуқбунёду адолатпарвар, пешрафти соҳаҳои гуногуни ҳаёти ҷамъиятию сиёсӣ равона шудаанд, - афзуд Музаффар Ашуриён.

Сайфиддин Сироҷзода гуфт, ки мақом ва нақши волоияти қонун дар устуворию пешрафти ҷомеа, махсусан дар кишварҳои рӯ ба инкишоф калидӣ арзёбӣ мегардад, зеро рушди иқтисоди ҷомеа, аз ҷумла соҳибкорӣ, тиҷорат, дар маҷмуъ, муносибатҳои бозорӣ, низому тартибот, қонуният, кафолат ва ҳифзи ҳуқуқу манфиатҳои онҳоро талаб менамояд. Аз ин рӯ, волоияти қонун яке аз омилҳои муҳиму меҳварии рушди босуръати иқтисодию иҷтимоӣ, сиёсию фарҳангии ҷомеа мебошад.

Бояд тазаккур дод, ки Вазорати адлияи Ҷумҳурии Тоҷикистон созмондиҳандаи Форуми миллӣ буда, ягона пойгоҳест, ки ҳуқуқшиносони мамлакатро барои муайян намудани афзалият ва таҳияи пешниҳодҳо барои мусоидат ба волоияти қонун, дастрасӣ пайдо кардан ба адолати судӣ дар Тоҷикистон муттаҳид месозад.

Ҳадаф аз он муайян намудани мушкилотест, ки барои таҳкими волоияти қонун дар Тоҷикистон монеа эҷод мекунанд. Инчунин, ҷустуҷӯи муштараки роҳҳо тавассути табодули таҷриба, муҳокимаи озод, таҳияи тавсияҳои мушаххаси пешниҳодҳо бо мақсади таъмини волоияти қонун дар Тоҷикистон ва баробарии шаҳрвандон дар назди қонун мебошад.

 

М. МИРЗОЁН, “Ҷумҳурият”