9 ноябр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи мамлакат муҳтарам Эмомалӣ Раҳмон ва Раиси Маҷлиси миллии Маҷлиси Олӣ, раиси шаҳри Душанбе Рустами Эмомалӣ бинои қисми ҳарбии 3505-и раёсати Қӯшунҳои дохилии ВКД-ро мавриди баҳрабардорӣ қарор дода, бо шароити будубоши хизматчиёни ҳарбӣ шинос шуданд.

Бино сеошёна буда, барои хизмати афсарону сарбозон мутобиқ ба талабот шароит фароҳам оварда шудааст. Дар ошёнаи якум ҳуҷраҳои кории афсарон, нуқтаи тиббӣ, дар ошёнаҳои дуюму сеюм хобгоҳ, ҳаммом, китобхона ва маҷлисгоҳ ҷойгиранд. Дар ҳудуди қисми низомӣ ошхона бо 160 ҷой, толору майдончаҳои муосири варзиш, майдони сафороӣ ва дигар инфрасохтори зарурӣ сохта шудааст.

Президенти мамлакат муҳтарам Эмомалӣ Раҳмон ба шароити фароҳамшуда баҳои баланд дода, афсарону сарбозонро барои содиқона хизмат намудан ба нафъи давлату миллат ва ҳифзи истиқлоли давлатии Тоҷикистон ҳидоят карданд.

Давоми солҳои соҳибистиқлолӣ бо ташаббус ва таваҷҷуҳи хоссаи Пешвои миллат муҳтарам Эмомалӣ Раҳмон заминаи моддию техникии ҷузъу томҳои Қувваҳои Мусаллаҳ беҳтар гардида, афсарону сарбозон пайваста дастгирӣ меёбанд.

Натиҷаи ҳамин аст, ки имрӯзҳо ҷавонони шуҷои миллат баҳри ҳимояи Модар-Ватан омода буда, сарбаландона саҳми худро дар таъмини сулҳу субот ва сарҷамъии миллат мегузоранд.

Ҳадаф ва рисолати афсарони қисми ҳарбии 3505 таҳкими иқтидори ҷангии Қӯшунҳои дохилӣ вобаста ба таъмини амният, ҳифзи тартиботи ҷамъиятӣ, ҳимояи иншооти махсуси муҳими давлатӣ, мубориза бар зидди терроризм, қочоқи ғайриқонунии маводи мухаддир ва дигар ҷиноятҳои муташаккили ба амнияти ҷомеа хавфэҷодкунанда ба ҳисоб меравад.

Мураккаб гаштани вазъи сиёсии кишварҳои ҷаҳон кормандони ниҳодҳои ҳарбиро, ки бештар масъулияти бузурги ҳифзи Ватану таъмини суботу осоиштагии мардум аз онҳо бастагӣ дорад, водор месозад, то дар иҷрои ин рисолат беш аз ҳарвақта масъулиятнок бошанд.

Баъди боздид аз бинои қисми низомӣ, Президенти мамлакат муҳтарам Эмомалӣ Раҳмон дар фазои тантанавӣ ба командири баталйони таъиноти махсуси  қисми ҳарбии 3505-и раёсати Қӯшунҳои дохилӣ байрақи ҷангиро ҳамчун рамзи қисми ҳарбӣ, шараф, ҷасорат, шуҷоат, содиқ  будан ба савганди ҳарбӣ ва хизмати софдилона ба Ватан супурданд.

Дар ҳамин ҷо, пас аз садо додани Суруди миллӣ, Сарвари давлат муҳтарам Эмомалӣ Раҳмон дар расми гузашти низомӣ иштирок ва суханронӣ намуданд. Баъди суханронии Пешвои миллат муҳтарам Эмомалӣ Раҳмон бо амри фармондеҳи парад ба муносибати Рӯзи милитсияи тоҷик гузашти ҳарбӣ оғоз гардид.

Дар он кормандони раёсату шуъбаҳо, хадамот, ҷузъу томҳои Қӯшунҳои дохилӣ ва дигар сохторҳои таркибии Вазорати корҳои дохилӣ ширкат варзиданд.