Паҳлавони тоҷик Субҳиддин Халилзодаи 20 - сола, ки донишҷӯи курси 3-юми Донишкадаи тарбияи ҷисмонии Тоҷикистон ба номи С. Раҳимов мебошад, дар Чемпионати ҷаҳон оид ба самбо миёни ҷавонон (14 – 16 октябри соли 2022, Ереван, Арманистон) дар вазни 71 килограмм мақоми дуюмро касб намуд. Ӯ дар финал аз қаҳрамони ҷаҳон миёни наврасон Алӣ Дагоеви россиягӣ мағлуб шуд.

Субҳиддин то роҳ ёфтан ба вохӯрии ҳалкунанда дар зӯрозмоӣ бар Ярмуш Иван (Беларус, 6:0), Абдумажит Серик (Қазоқистон, 5:2) ва Ох Сион (Корея, 8:0) дастболо гардид. 

Имкони хуб доштам то қаҳрамони ҷаҳон шавам, вале бахт ба рӯи Алӣ Дагоев хандид. Бояд гӯям, ки ӯ аз ман дида хубтар гӯштӣ гирифт. 

Ба қаҳрамонии ҷаҳон дастаи мунтахаби Тоҷикистон бо омодагии ҷиддӣ сафарбар гардида буд. Аз 17 нафари ширкатдошта ба 7 самбочӣ муяссар гашт, ки қаҳрамон ва ҷоизадори чемпионат шаванд. Мо ба хазинаи варзишии кишвар 7 медал (як тилло, ду нуқра ва чор биринҷӣ) ворид намудем,– гуфт Субҳиддин Халилзода. 

Гӯштигири ҷавони тоҷик аз синни 12-солагӣ зери роҳбарии мураббиҳо Иззат Худоиев ва Абдураҳмон Абдуллоев дар Мактаби ҷумҳуриявии маҳорати олии варзишӣ оид ба намудҳои гӯштӣ аз рӯи ин риштаи варзиш тамрин менамояд.

Иззат Худоиев, мураббии Субҳиддин, ки ҳамроҳаш ба рӯзномаи “Ҷумҳурият” омада буд, чунин иброз дошт: “Аз Субҳиддин умедҳои калон дорам. Дар тамринҳо ва мусобиқоти дохилию хориҷӣ маҳорати баланд нишон медиҳад. Миёни самбочиёни қора ва ҷаҳон аз зумраи намоёнҳост. Итминон дорам, ки дастпарварам миёни калонсолон низ, Тоҷикистонро дар арсаи байналмилалӣ арзанда муаррифӣ намуда, ба натиҷаи назаррас ноил мегардад”.

Бояд гуфт, ки Субҳиддин дар мусобиқоти дохилӣ дурахши хуб дорад. Дар намуди самбо шаш карат қаҳрамони Тоҷикистон миёни наврасон ва ҷавонон мебошад. Ҳоло миёни ҷавонон ӯ чемпиони феълии кишвар маҳсуб меёбад. Дар баробари гӯштии самбо вай, инчунин, дар намудҳои дзюдо, кураш ва гӯштии миллӣ «Гӯштигирӣ» ҳунар озмуда, ба натиҷаҳои дилхоҳ даст ёфтааст. Ду бор унвони чемпионии мамлакатро оид ба дзюдо миёни наврасон ва ҷавонон соҳиб гардида, қаҳрамони Тоҷикистон оид ба кураш миёни калонсолон (2022) мебошад. Ҳамзамон, дар гӯштии миллӣ «Гӯштигирӣ» байни ҷавонон (4 бор) ва калонсолон (2 бор) дар кишвар пирӯз шудааст.

Қаҳрамони мо аввалин медали худро дар мусобиқаи байналмилалӣ соли 2018 ба даст овардааст. Мавсуф дар Чемпионати ҷаҳон байни мактаббачаҳо (Орел, Федератсияи Россия, 2018) барандаи медали биринҷӣ шуда буд. Сипас, дар Чемпионати ҷаҳон байни наврасон (Тошкент, Ӯзбекистон, соли 2019) низ, зинаи сеюмро соҳиб гашт. Соли гузашта дар Чемпионати Осиё, ки дар шаҳри Тошкент гузашт, миёни ҷавонони қора сазовори нишони нуқра гардид. 

Имсол бошад, дар Чемпионати Осиё оид ба кураш, ки шаҳри Душанбе мизбони он буд, мақоми дуюмро касб кард. 

Субҳиддин Халилзода ба саволи чаро наметавонад дар се финал пирӯз шавад, чунин посух дод: “Рақобати ниҳоӣ дар мусобиқоти бонуфуз, аз ҷумла чемпионатҳои Осиё ва ҷаҳон, барои варзишгар аз ҳар ҷиҳат мушкил меафтад. Дар баробари зӯру бозуи боқувват, инчунин, аз нигоҳи равонӣ низ бояд омода бошӣ. Мутаассифона, дар се набарди финалӣ бахти варзишиам омад накард”.

– Орзуи ҳар варзишгар қаҳрамони Бозиҳои олимпӣ, ҷаҳон ва қора шудан аст. Ман ҳам истисно нестам, зеро вақте болои суфаи ифтихорӣ мебароӣ, ба шарафат Суруди миллии кишварат садо медиҳад ва ашки шодӣ беихтиёр ҷорӣ мешавад, ҳазорон нафар ба хотири ҳунари волоят каф мезанад, сарат баланд ва дилат ором мегирад. Он замон эҳсос менамоӣ, ки кӯшишу заҳматҳоят бесамар набудаанд, – зикр кард ҳамсуҳбати мо. – Мехоҳам изҳори сипоси худро тариқи рӯзномаи “Ҷумҳурият” ба Шодӣ Сафар, ректори Донишкадаи тарбияи ҷисмонии Тоҷикистон ба номи С. Раҳимов ва устодони Донишкада барои дастгириашон расонам.

 

Маҳмуд БАҲРОМ, 

“Ҷумҳурият”