Аз 15 то 18 ноябр дар пойгоҳи Донишгоҳи давлатии Урали Ҷанубӣ (шаҳри Челябинск) Форуми ҷавонони Россия ва Тоҷикистон таҳти унвони “Воқеияти нав – расонаҳои нав” баргузор гардид. Дар он донишҷӯёни факултети журналистикаи Донишгоҳи миллии Тоҷикистон бо роҳбарии декани факултет, доктори илмҳои филология, дотсент Абдулмуъмин Қутбиддинов, донишҷӯёни  Донишгоҳи славянии Россияву Тоҷикистон ва лидерони ҷавони кишвар ширкат доштанд. 

 

Дар Форум, инчунин, намояндагони созмонҳои ҷамъиятии ҷавонон, роҳбарони ҷавон, донишҷӯёни донишгоҳҳо, намояндагони сохторҳои амалкунандаи сиёсати ҷавонон дар Россия ва Тоҷикистон аз шаҳрҳои Душанбе, Хуҷанд, Москва, Санкт-Петербург, Саратов, Архангелск ва дигар шаҳру ноҳияҳо иштирок намуданд.

Иштирокчиёни Форумро Консули генералии Ҷумҳурии Тоҷикистон дар шаҳри Екатеринбург Зафар Сайидзода, сардори Сарраёсати сиёсати ҷавонони вилояти Челябинск Светлана Калимуллина ва иҷрокунандаи вазифаи ректори Донишгоҳи Урали Ҷанубӣ Александр Вагнер истиқбол гирифтанд.

Ректори Донишгоҳи давлатии Урали Ҷанубӣ зикр кард, ки вазифаи муҳими Форуми мазкур ташаккули фазои ягонаи илмию таълимист. ДДУҶ ҳамчун минбари форум тасодуфан интихоб нашудааст, мо бо донишгоҳҳо ҳамкории хуб дорем ва дар ин самт дар манотиқи Тоҷикистон фаъолона кор карда истодаем. Ман мехостам, ки чорабинӣ шаклҳои нави ҳамкорӣ, роҳҳои алоқаи иттилоотиро пайдо кунад, то ҳамон шароите, ки дар донишгоҳҳои Россия вуҷуд доранд, ба Тоҷикистон низ, бурда шаванд. Нуқтаи муҳим ин мутобиқшавӣ, дарки анъанаҳо, фарҳанг ва таърихи давлатҳои гуногун мебошад. Ин на танҳо барои шаҳрвандони хориҷӣ, балки барои мо низ, зарур аст, робитаи дурустро пайдо кунем, дӯстии нав бунёд намоем, то ки ин дӯстӣ ҷаҳонӣ гардад.

Ба андешаи Латифабону Рустамзода, иштирокчии Форум, ин чорабинӣ барои барқарорсозии робитаи дӯстии дуҷониба заминаи хубе хоҳад гузошт: "Барои дарёфт ва аз худ намудани донишҳои нав дар фазои медиажурналистика ба Россия омадам ва баъд аз иштирок дар дарсҳои маҳорат, саволу ҷавоб маълумоти нав гирифтам ва умедворам, ки дар давоми фаъолияти рӯзноманигориам аз онҳо истифода менамоям. Бояд гуфт, ки баргузории чунин форум бароям таассуроти рангину хотирмон гузошт ва таконе барои сохтани шахсияту оянда шуд". 

Чорабинии мазкур соли сеюм баргузор мегардад ва он аз ҷониби Вазорати илм ва таҳсилоти олии Федератсияи Россия, созмони пойгоҳи кишварҳои узви ИДМ оид ба кор бо ҷавонон ва Ассотсиатсияи иттиҳодияҳои ҷамъиятии “Шурои миллии Ассотсиатсияи ҷавонон ва кӯдакони Россия” ташкил карда шуд.  

Бояд гуфт, ки дар Форум хабарнигорони “Ҷумҳурият” Латифабону Рустамзода, Дилноза Ҳукматуллоева ва ман – муаллифи ин сатрҳо иштирок доштем. 

 

Оламбегими НЕКҚАДАМ,

Душанбе – Челябинск – Душанбе