Аргентина баъди 36 сол боз чемпион шуд 

Тими миллии Аргентина зери роҳбарии сармураббӣ Лионел Скалони (ин мутахассис ҷавонтарин мураббӣ дар ин мундиал аст) дар бозии финалии Ҷоми ҷаҳон-2022 мунтахаби Франсияро аз рӯи силсилаи пеналти бо ҳисоби 4:2 (вақти асосӣ ва иловагӣ – 3:3) шикаст дода, бори сеюм (қаблан, солҳои 1978, 1986) қаҳрамони ҷаҳон шуд. 

Вохӯрии ҳалкунанда 18 декабр дар варзишгоҳи “Лусаил Айконик”-и шаҳри Лусаил бо ҳузури беш аз 90 ҳазор тамошогар баргузор гашт. 

Нимаи аввали қувваозмоӣ бо бартарии аргентиниҳо сурат гирифта, онҳо бо голҳои задаи Лионел Месси (дақ. 23, пеналти) ва Ангел Ди Мария (дақ.36) ба танаффус баромаданд. 

Қисми дуюми зӯрозмоӣ ранги дигар гирифт. Бозигари Франсия Килиан Мбаппе тавонист дар дақиқаи 80-ум пеналтиро бе хато иҷро намуда, таносуби тӯбҳоро коҳиш диҳад. Ҳамин тавр, ӯ пас аз як дақиқаи дигар голи дуюмро зада, бозиро ба вақти иловагӣ кашид. 

Дар дақиқаи 108 Месси боз дастаашро ба пеш баровард. Аммо Мбаппе натиҷаро (дақ.118, пеналти) баробар намуд. 

Дар силсилаи пеналти аргентиниҳо чор зарбаро бехато ба нишон расонданд, вале фаронсавиҳо танҳо ду гол заданд. Як пеналтиро дарвозабон баргардонд ва зарбаи дигар хато буд. 

Ҳамин тавр, Энтсо Фернандес (беҳтарин бозигари ҷавони Ҷоми ҷаҳон), Эмилиано Мартинес (беҳтарин дарвозабон), Килиан Мбаппе (беҳтарин нишонзан) ва Лео Месси (беҳтарин бозигари Ҷоми ҷаҳон) эътироф шуданд. 

Бояд гуфт, ки мақоми сеюмро дар Қатар мунтахаби Хорватия пас аз шикаст додани Марокаш ба ҳисоби 2:1 ба даст овард.

 

 

 

 

ГӮШТӢ

Муҳаммадамин ғолиби мусобиқаи байналмилалии “Таҳсил”

Ба иттилои Кумитаи миллии олимпии кишвар, Муҳаммадамин Абдуллоев, гӯштингири ҷавони тоҷик дар мусобиқаи байналмилалии “Таҳсил” миёни наврасони то 17-сола (16 – 19 декабр,  Боку, Озарбойҷон) сазовори медали тилло шуд.

Муҳаммадамин дар вазни -80 килограмми гӯштии тарзи озод бар ҳамаи ҳарифон ғолиб омада, дар финал варзишгари Қазоқистон Илёс Аманжолро шикаст дод.

Дар мусобиқа варзишгарони Озарбойҷон, Қазоқистон, Тоҷикистон, Франсия, Британияи Кабир ва Исроил ширкат доштанд.

 

Маҳмуд БАҲРОМ, шореҳи варзиш