Дар соли 2021 ва аввалҳои соли 2022 тарки пеша кардану ба муҳоҷирати меҳнатӣ рафтани табибони соҳибтаҷриба ва ҳамшираҳои тиббӣ аксари муассисаҳои тандурустии шаҳру навоҳии кишварро ба мушкилоти кадрӣ мувоҷеҳ сохта буд. Бавижа, дар шашмоҳаи аввали соли гузашта ҳудуди 11  табиб, ки аксарияти онҳо таҷрибаи баланди касбӣ доштанд, аз муассисаҳои кумаки аввалияи тиббию санитарии шаҳри Турсунзода бо хоҳиши худ аз кор озод гардида, ба Федератсияи Россия ҳиҷрат карданд. Давоми панҷ моҳи охири соли 2022 ба муҳоҷират рафтани духтурон коҳиш ёфтааст. 

Зоир Ибодуллоев, роҳбари муассисаҳои кумаки аввалияи тиббии шаҳри Турсунзода, зимни суҳбат тазак-кур дод: 

– Дарвоқеъ, пайи ҳам аз кор рафтани табибони баландтахассус моро ҷиддӣ нигарон карда буд. Зимнан, 9 духтури маълумоти олидор: табиби оилавӣ, ҷарроҳ, саратоншинос ва пизишки бемориҳои амрози даруна, ки ба Федератсияи Россия барои кор рафта буданд, ба Ватан баргашта, онҳоро дубора ба кор пазируфтем. Аз моҳи январ то июни соли 2022-юм  38 ҳамшираи тиббӣ тарки кор кард. Ба ҷойи онҳо 45 нафар дорои маълумоти миёнаи тиббиро ба кор қабул кардем, вале норасоии кадрӣ дар муассиса бартараф нашудааст.

Алҳол дар муассисаи фавқуззикр 926 корманд фаъолият дорад, ки аз ин шумора 170 табиб ва 538 нафар ҳамшираи тиббӣ мебошад. Нарасидани духтури оилавӣ мушкили № 1 дар КАТС маҳсуб мешавад. Бино ба иттилои мутасаддиён, марказҳои саломатии деҳавӣ ва бунгоҳҳои тиббии шаҳр ба 50 табиби оилавӣ эҳтиёҷ доранд. Алъон аз рӯи ихтисоси зикршуда, 50 воҳиди корӣ дар КАТС холӣ аст. Дар марказҳои сало-матӣ як табиб, ҳатто, ба ҷойи ду нафар фаъолият мекардааст. Гузашта аз ин, муассисаҳои кумаки аввалия ба 6 дандонпизишк ниёз доранд. 

– Феълан, дар шаҳри Турсунзода 28 маркази саломатии деҳавӣ ва 50 бунгоҳи тиббӣ амал менамояд. Бунгоҳҳое, ки дар хонаҳои истиқоматӣ ва иншооти шахсӣ фаъолият мекарданд, бо ташаббуси соҳибкорону ашхоси саховатпеша соҳиби бино гардиданд. Бо саҳмгузории соҳибкорон сохтмони як хонаи саломатӣ дар деҳаи Тойчии деҳоти Навобод ва бо сармоягузории ташкилоти хайриявии «Тавҳид» дар ҷамоатҳои деҳоти Регар ва Ҷӯра Раҳмони шаҳр бошад, сохтмони се хонаи саломатӣ ҷараён дорад.  Лоиҳаи минтақавии CASA-1000 низ, дар Ҷамоати деҳоти Қаратоғ маркази саломатӣ бунёд карда истодааст, – афзуд З. Ибодуллоев. 

 

Ёқуби СОДИҚ,

«Ҷумҳурият»