Рустам Солихов, мудири маорифи ноҳияи Восеъ иттилоъ дод, ки дар  муассисаҳои таълимии ноҳия бунёди синфхонаҳои иловагӣ оғоз гардида, корҳои сохтмонӣ бо вусъат идома доранд. Баъди анҷоми корҳо дар ноҳия чор муассисаи нави таълимӣ ва 64 синфхона ба фаъолият мепардозад.

Аз ҷумла, дар Муассисаи таҳсилоти миёнаи умумии № 53 - и шаҳраки Ҳулбуки ноҳия даҳ синфхонаи иловагӣ барои 250 ҷойи нишаст аз ҳисоби падару модарон ва соҳибкорон, МТМУ № 16, Ҷамоати деҳоти Х. Раҷабов шаш синфхона бо 150 ҷойи нишаст аз ҳисоби соҳибкорони ватанӣ – оилаи Камолзодаҳо, дар МТМУ № 47, Ҷамоати деҳоти Мирзоалӣ Вайсов даҳ синфхона барои 240 ҷойи нишаст аз ҳисоби Бонки исломии рушд ва Шоҳигарии Арабистони Саудӣ, МТМУ № 49, деҳаи Охҷари Ҷамоати деҳоти Миралӣ Маҳмадалӣ даҳ синфхона барои 240 ҷойи нишаст, МТМУ № 54 даҳ синфхона бо 240 ҷойи нишаст, МТМУ № 55, Ҷамоати деҳоти Тугарак чор синфхона барои 100 ҷойи нишаст бо дастгирии кумитаи падару модарон, МТМУ № 56 деҳаи Дашти Дилоии Ҷамоати деҳоти Мирзоалӣ Вайсов даҳ синфхона бо 240 ҷойи нишаст, дар МТМУ № 25, Ҷамоати деҳоти Миралӣ Маҳмадалӣ ду синфхонаи иловагӣ бо 50 ҷойи нишаст ва МТМУ № 27, Ҷамоати деҳоти Тугарак ду синфхона бо 50 ҷойи нишаст аз ҳисоби кумитаи падару модарон сохта ба истифода дода мешаванд.

Номбурда иттилоъ дод, ки бо дастгирии Бонки исломии рушд сохтмони чаҳор муассисаи таълимии дигар ба нақша гирифта шуда,  онҳо дар давоми солҳои 2022 - 2025 мавриди истифода қарор мегиранд.

Сабаби оғоз ёфтани сохтмони пурвусъати синфхонаҳо барои рафъи мушкилоти норасоии ҷойи нишаст дар муассисаҳои таълимии ноҳия буда, сохтмон бо дастгирии Вазорати маориф ва илм, Вазорати молияи ҷумҳурӣ ҷараён дорад.

Рустам Солихов, инчунин, иттилоъ дод, ки дар даҳ моҳи соли гузашта дар олимпиадаҳои ҷумҳуриявӣ 62 таълимгирандаи ноҳия иштирок намуда, соҳиби ҷойҳои намоён гардиданд ва бо медалу сипосномаҳо қадр шуданд. Бояд тазаккур дод, ки хонандагони ноҳия дар олимпиадаҳои байналмилалӣ 24 ҷойи ифтихориро ба даст оварданд. Аз ҷумла, 2 медали тилло, 9 медали нуқра ва 13 медали биринҷӣ маҳсули талоши онҳо дар арсаи илму дониш аст.

 

Суннати СОДИҚ, “Ҷумҳурият”