Бо мақсади танзими нарху навои бозор дар асоси фаъолияти гурӯҳи кории Мақомоти иҷроияи ҳокимияти давлатии Вилояти Мухтори Кӯҳистони Бадахшон, шаҳри Хоруғ ва сохторҳои дахлдор нархи 1 кг гӯшт дар шаҳри Хоруғ аз 60 сомонӣ ба 55 сомонӣ фароварда шуда, 5 сомонӣ арзон гардид. Ин тадбир бо мақсади беҳтар намудани сифати зиндагии сокинон ва дастрасӣ доштан ба маҳсулоти ниёзи мардум роҳандозӣ гардид.

Дар ин бора аз Мақомоти иҷроияи ҳокимияти давлатии шаҳри Хоруғ ба рӯзномаи «Ҷумҳурият» хабар доданд. Бино ба иттилои манбаъ, дар баробари ин, бинобар паст рафтани нархи сӯзишворӣ дар бозори ҷаҳонӣ нархи роҳкиро дар нақлиёти ҷамъиятии хатсайрҳои ҳудуди шаҳри Хоруғ аз 2 сомону 50 дирам ба 2 сомонӣ фароварда шуд. Дар сурати саркашӣ намудани ронандагони нақлиёти мусофиркашонӣ аз талаботи болозикр, сокинон метавонанд ба Мақомоти иҷроияи ҳокимияти давлатии шаҳри Хоруғ муроҷиат намоянд.

Ёдовар мешавем, ки тайи чанд рӯзи охир арзиши нархи гази моеъ, ки яке аз навъҳои асосии сӯзишворӣ маҳсуб мешавад, дар ҳудуди ҷумҳурӣ бо нархи 3,8 сомонӣ барои як литр фурӯхта мешавад. Дар ҳамин ҳол, як сол пеш як литри ин сӯзишворӣ 7-8 сомонӣ арзиш дошт.

Ин ду иқдоми Мақомоти иҷроияи ҳокимияти давлатии шаҳри Хоруғ намунаи ибрат ва пайравӣ буда, дар байни тамоми шаҳру ноҳияҳои мамлакат собиқа надорад. Вале, суоле ба миён меояд, ки чаро калонтарин шаҳру ноҳияҳои чорвопарвари мамлакат аз ин иқдом – арзон кардани нархи гӯшт пайравӣ намекунанд ё дар маҷмуъ,  пайи  арзон  кардани  арзиши  ин  маҳсулот дар бозор нестанд? Ин дар ҳолест, ки Вазорати кишоварзӣ ва дигар сохторҳо ҳамасола аз зиёд шудани саршумори чорво дар мамлакат ҳисобот медиҳанд.

Панҷ сомонӣ арзон намудани арзиши гӯшт дар шаҳри Хоруғ дар ҳолест, ки ин маҳсулот аз ноҳияҳои Ишкошим, Роштқалъа, Мурғоб, Рӯшон ва Шуғнон ба маркази маъмурии Вилояти Мухтори Кӯҳистони Бадахшон – шаҳри Хоруғ ворид мешавад.

Маводи сӯзишворӣ низ аз шаҳри Душанбе ва вилояти Суғд ба ВМКБ ворид мегардад. Бо вуҷуди нисбат ба дигар шаҳру ноҳияҳои мамлакат қимат будани арзиши сӯзишворӣ дар ВМКБ, чунин иқдом, ки ба поён бурдани арзиши роҳкиро равона шудааст, танҳо дар шаҳри Хоруғ рӯи даст гирифта шуд. Дар ҳоле ки ба ҳолати 16 январ, агар арзиши як литр гази моеъ дар шаҳри Душанбе 3,80 – 4 сомонӣ бошад, дар шаҳри Хоруғ 6,80 сомониро ташкил медиҳад. 

Хулоса, ин ду иқдоми пешгирифтаи роҳбарияти шаҳри Хоруғ барои тамоми шаҳру ноҳияҳои мамлакат, аз ҷумла поён бурдани нархи гӯшт, барои роҳбарони калонтарин ноҳияи чорвопарвари кишвар бояд ҷойи андеша ва ибратомӯзӣ бошад.

 

Лашкар ШАРИФЗОДА, “Ҷумҳурият”