ТАСС. Рӯзномаи “Dawn”  бо такя ба намояндаи бемористон хабар дод, ки бар асари таркиш дар як масҷиди шаҳри Пешовари Покистон 72 нафар ба ҳалокат расида, 157 нафар ҷароҳат бардошт. 

Ба гуфтаи мақомоти амнияти миллӣ, як террористи маргталаб ҳангоми намози нисфирӯзӣ дар масҷиде, ки пур аз мардум, аз ҷумла полис ва низомиён буд, маводи таркандаро ба кор даровардааст.   Дар маҳали ҳодиса амалиёти наҷотбахшӣ идома дорад ва шумораи қурбониён метавонад афзояд. Зикр мешавад, ки ҳангоми таркиш дар масҷид то 500 нафар ҳузур дошт.

Ба гузориши шабакаи телевизионии “Geo TV”, масъулияти ин ҳамларо  гурӯҳи дар Покистон мамнуи “Таҳрики толибони Покистон” ба уҳда гирифтааст.

 

 

Лавров кишварҳои асосии довталаб  ба узвияти СҲШ-ро ном бурд

Мир24. Аъзои комилҳуқуқи Созмони ҳамкории Шанхай (СҲШ) дар ояндаи наздик барои қабули кишварҳои Эрон ва Беларус, ки аз довталабони аввалиндараҷа барои шомил шудан ба ин Созмон ба ҳисоб мераванд, омодагӣ мегиранд. Дар ин бора Сергей Лавров, вазири корҳои хориҷии Россия, дар нишасти матбуотӣ дар пайи музокирот бо ҳамтои худ аз Покистон Билавол изҳор дошт. Вазири корҳои хориҷии Россия зикр кард, ки Россия ва Покистон ба рушди ҳамкориҳо тавассути СҲШ манфиатдор мебошанд.

«Самаранокии ин сохторро таваҷҷуҳи афзояндаи кишварҳои ғайриузв барои ҳамкории зич бо Созмон ва пайвастан ба узвияти он тасдиқ мекунад», – хулоса намуд Лавров.

 

 

Суҳбати телефонии Путин бо Муҳаммад бин Салмон оли Сауд   

Известия.  Бино ба иттилои хадамоти матбуоти Кремл, Президенти Россия Владимир Путин бо  валиаҳди Арабистони Саудӣ Муҳаммад бин Салмон оли  Сауд  суҳбати телефонӣ анҷом дод.

Гуфта мешавад, ки раҳбарони ду кишвар масоили густариши минбаъдаи ҳамкориҳои дуҷониба дар бахшҳои сиёсӣ, тиҷоративу иқтисодӣ ва энергетикиро баррасӣ карданд. Илова бар ин, ҳамкориҳо дар чаҳорчӯби ОПЕК+ ҷиҳати таъмини суботи бозори ҷаҳонии нафт баррасӣ шуданд.

 

 

Имзои Эъломия байни Озарбойҷон ва Маҷористон  

Мир 24. Президенти Озарбойҷон бо  сафари расмӣ вориди Маҷористон шуд. Меҳмони олиқадрро Президенти мамлакат Каталин Новак пешвоз гирифт.   

Президенти Маҷористон ҳамкориҳоро дар бахши энергетика яке аз масъалаҳои муҳими ду кишвар арзёбӣ кард. 

Дар навбати худ, Илҳом Алиев аҳамияти Ёддошти тафоҳумро таъкид намуда, иброз дошт, ки ҳуҷҷат ба хотири роҳандозии фаъолият дар соҳаи таъмини гази табиӣ ба имзо мерасад.

Президент Илҳом Алиев дирӯз  бо Виктор Орбан, Сарвазири Маҷористон мулоқот намуд. Онҳо Эъломияи муштаракро дар бораи тавсеаи шарикии стратегии байни кишварҳо имзо карданд.