Сабаби дар бозорҳои кишвар давоми чанд рӯзи охир то 7 сомонӣ боло рафтани нархи пиёзро мутахассисони соҳа ба ҳолати фавқулодаи якбора сард омадани боду ҳаво рабт медиҳанд, ки дар натиҷа зироат талаф ёфт. 

 

Тавре Ҷалил Пиризода, директори Институти иқтисодиёт ва таҳқиқи системаи рушди кишоварзӣ, изҳор дошт, боло рафтани арзиши маҳсулоти зироат дар фасли сармо ҳолати маъмулист. Ҳарчанд солҳои охир нархи зироатҳо, аз ҷумла картошка, пиёз ва сабзӣ, бо  назардошти афзоиши ҳаҷми истеҳсол, ба танзим дароварда шудааст, аммо омилҳои гуногуни таъсиррасон зиёданд. 

Ба гуфтаи номбурда, барои таъмини аҳолӣ бо пиёз захираи он дар анборҳо ба роҳ монда мешавад. Имсол низ мувофиқи талаботи аҳолӣ пиёз дар анборҳо захира гардид, аммо азбаски таркиби пиёз бештар аз об иборат аст, он дар анборҳо ба хунукии чанд рӯзи охир тоб наоварда талаф ёфт. Ин ҷо, албатта, норасоии анбори замонавӣ мушкилӣ эҷод кард, ки проблемаи асосии бисёр кишоварзон мебошад.

Мувофиқи маълумоти расмӣ, кишоварзони мамлакат соли гузашта 672 ҳазор тонна пиёз истеҳсол карданд, ки нисбат ба соли 2021 кам аст. Камшавии истеҳсол бо сабаби дар майдони кишт нисбатан кам коридани ин номгӯи зироат мебошад. 672 ҳазор тонна пиёз барои таъмини пурраи аҳолӣ басанда аст, зеро аз рӯи меъёрҳои тавсиявии физиологии  истеъмоли маҳсулоти асосии озуқаворӣ ба ҳар сари аҳолӣ, дар ҷумҳурӣ талаботи умумӣ ба пиёз 200 ҳазор тоннаро ташкил медиҳад. Танҳо мушкили дар чунин сардиҳо (10-15 дараҷа хунук) дуруст нигоҳубин  ва захира карда натавонистани пиёз нархи онро то ин андоза боло бурд. Баландтарин нархи пиёз 3,5-4 сомонӣ буда, имсол то 7 сомонӣ қимат шудани он бори аввал аст. Аз ин рӯ, барои беталаф мондани маҳсулот дар ҳама фасли сол зарурати бунёди ҳарчи бештари ҷойи нигоҳдории маҳсулот – анборҳои замонавӣ ба миён омадааст. Теъдоди дар ҷумҳурӣ будани ҳамагӣ 210  анборхона бо ғунҷоиши 100 ҳазор тонна маҳсулот худ нишондоди хеле паст аст, ки аз масъулон андешидани тадбирҳои заруриро тақозо менамояд. 

 

Оҳистамоҳ ВАФОБЕК, 

“Ҷумҳурият”