мулоқотҳо
Мулоқоти судманди Эмомалӣ Раҳмон бо Маҳмуди Аҳмадинажод
9 июн Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Исломии Эрон Маҳмуди Аҳмадинажод, ки баҳри иштирок дар Конфронси байналмилалии бахшида ба рафти иҷрои Барномаи 10 – солаи амал «Об барои ҳаёт» ба шаҳри Душанбе ташриф овардааст, мулоқот намуд.
Масоили ҳамкории стратегии дуҷониба ва ҳамгироии бисёрҷонибаи Тоҷикистону Эрон нахуст дар вохӯрии хосаи сарони ду давлат, сипас дар музокироти васеъ бо иштироки ҳайатҳои ҳар ду ҷониб баррасӣ ёфтанд.
Таваҷҷӯҳи зиёд ба татбиқи лоиҳаҳои бунёдии инфрасохторӣ баҳри пайвастани роҳҳои оҳану мошингард ва хатҳои интиқоли нерӯи барқи Тоҷикистону Эрон аз тариқи қаламрави Афғонистон зоҳир гардид.
Сарвари давлати Тоҷикистон Эмомалӣ Раҳмон ба Маҳмуди Аҳмадинажод баҳри кӯмакҳои бародаронаи Ҷумҳурии Исломии Эрон дар бунёди Нерӯгоҳи барқи обии «Сангтӯда – 2» ва татбиқи бисёр лоиҳаҳои дигари иқтисодию тиҷоратӣ ва фарҳангӣ арзи сипос намуда, изҳори боварӣ кард, ки тавассути ҳамкории сеҷонибаи Тоҷикистону Эрон ва Афғонистон робитаҳои мустақими кишвари мо бо Осиёи ҷанубӣ ва баромади он ба роҳҳои баҳрӣ таъмин мегардад.
Президенти Ҷумҳурии Исломии Эрон Маҳмуди Аҳмадинажод омодагӣ ва ҳавасмандии кишварашро ба ҳамкории гуногунҷанба бо Тоҷикистон, аз ҷумла дар соҳаҳои иқтисод ва савдо, энергетика, саноат, кишоварзӣ, маорифу тандурустӣ, илму фарҳанг, ҳарбию техникӣ ва амнияти минтақавӣ, таъкид намуд.
Гуфтугӯи судманд ҳамчунин оид ба рӯзномаи мулоқоти ояндаи сарони давлатҳои Тоҷикистон, Эрон ва Афғонистон ва ҳамгироии муштарак баҳри таҳкими амнияти минтақавӣ, аз ҷумла дар самти пешгирӣ аз истеҳсол ва гардиши ғайриқонунии маводи мухаддир, сурат гирифт.
Баёни ақида (0) Санаи нашр: №: Мутолиа карданд: 1712
