илм
Қадами нахуст дар тағйироти сохторӣ ва ё гилагузорӣ аз фаъолияти хабарнигорон
-Бинобар ба охир расидани ваколати Раёсати Академияи илмҳо аъзои нави раёсат иборат аз 9 нафар дар ҷаласаи умумии фарҳангистони илми тоҷик аз нав интихоб гардид. Ба он Маҳмадшо Илолов, Президенти Академияи илмҳо, се нафар ноиби президент Саймаҳмад Одинаев, Муҳиба Ёқубова, Кароматулло Олимов, инчунин Ҳаким Аҳмадов, саркотиби илмӣ ва академикҳо Хуршед Ҳилолов,Талбак Назаров, Маҳкам Маҳмудов, Раҳим Масов интихоб шуданд.
Вазифаи академик-котибони шӯъбаҳо ихтисор гашта, фаъолияти онҳо ба зимаи ноибон вогузор шуд,- гуфт Кароматулло Олимов, ноиби президенти АИ ҶТ дар соҳаи илмҳои ҷамъиятшиносӣ, ба намояндагони ВАО дар нишасти матбуотӣ.
Бино ба иттилои ӯ ин тағйирот нахустгоме дар роҳандозии Қарори Ҳукумати ҷумҳурӣ оид ба бозсозии сохтории фарҳангистони улум аст.
Инчунин дар нишаст мавсуф аз фаъолияти хабарнигорон изҳори нигаронӣ намуда, иброз дошт, ки аксарияти онҳо дар инъикоси дастовардҳои илмии риштаҳои табиатшиносӣ касбияти ҳирфаӣ надоранд ва ба ин ҷурм васоити ахбори оммаро ба ВАО-и гуманитарӣ табдил додаанд.
Ба андешаи ӯ инъикоси дастовардҳои илм дар матбуоти даврӣ бисёр заиф гаштааст. Дар ҳоле ки олимони тоҷик дар бисёр риштаҳои илм, аз ҷумла кимиё, физика, иқтисодиёт, биология ва ғайра кашфиёти зиёд доранд.
Хайринисои Расулӣ
Баёни ақида (0) Санаи нашр: №: Мутолиа карданд: 4915
