маориф
Дар самти бо кор таъминсозии дастпарварони донишгоҳ мушкилиҳо ҷой доранд
Анвар Абдурасулов, ректори Донишгоҳи техникии Тоҷикистон ба номи академик Муҳаммадҷон Осимӣ, зимни нишасти матбуотӣ ба хабарнигорон гуфт, ки имсол донишгоҳро 1447 нафар хатм намуд, ки аз он 55 нафар соҳиби дипломи аъло гашт. Аз 2111 довталабе, ки ба донишгоҳ ҳуҷҷат супурд, 1997 нафар сазовори номи донишҷӯ гардид.
Дар самти фаъолияти илмии донишгоҳ чор семинар ва як конференсияи илмӣ гузаронида шуд. Дар бораи истифодаи телефонҳои мобилӣ, бо мошинҳои шахсӣ ба дарс омадан, риояи сару либоси донишгоҳӣ, ташвиқи одоби ҳамида чорабиниҳо барпо гардиданд.
Ҳамкорӣ бо донишгоҳу донишкадаҳои кишварҳои хориҷӣ хуб ба роҳ монда шуд. Дар ин давра ба 5 донишгоҳ робитаи дуҷониба барқарор гардид, ки барои пешрафти таълим, таҷрибаомӯзӣ мусоидат намуд. Умуман, донишгоҳ бо 50 донишгоҳи мамолики дунё робитаи зичи ҳамкорӣ дорад. Албатта, ин аз эътирофи мақому мартабаи муассисаи таълимии кишвар гувоҳӣ медиҳад. Ҳамзамон водор месозад, ки сатҳу сифати таълиму тарбия баландтар бардошта шаваду шумораи ихтироу навовариҳо зиёд гардад.
Ректори донишгоҳ дар посух ба саволи хабарнигори рӯзнома оиди ба ҷои кор таъмин намудани хатмкунандагон гуфт, ки дар ин самт ҳанӯз мушкилиҳои зиёд ҷой доранд. Талабот ба хатмкунандагони донишгоҳ гӯё зиёд аст, аммо мониторинги пешакии бозори меҳнат ва ҷобаҷогузории муташаккилонаи хатмкунандагон ҳоло ҳам муайян нест.
Фарзонаи Файзалӣ
Баёни ақида (0) Санаи нашр: №: Мутолиа карданд: 5480
