барқияҳо
Барқияи тасаллияти Президенти Ҷумҳурии Тоҷикистон Эмомалӣ Раҳмон ба Президенти Федератсияи Русия Дмитрий Медведев вобаста ба даргузашти арбоби намоёни давлатии ин кишвар Виктор Черномирдин
3 ноябр Президенти Ҷумҳурии Тоҷикистон Эмомалӣ Раҳмон ба Президенти Федератсияи Русия Дмитрий Медведев вобаста ба даргузашти арбоби намоёни давлатии ин кишвар Виктор Черномирдин барқияи тасаллият ирсол намуд.
Сарвари давлати Тоҷикистон Эмомалӣ Раҳмон аз хизматҳои шоёни Виктор Черномирдин дар дохил ва хориҷи кишвараш ҳангоми адои вазифаҳои гуногуни давлатӣ, аз ҷумла Раиси Ҳукумати Федератсияи Русия дар солҳои вазнини 90-уми асри гузашта ёдовар шуда, ба нақши ӯ дар ташкили давлати навини демократии Русия ва иқтисоди бозории он баҳои баланд додааст.
Президенти Ҷумҳурии Тоҷикистон Эмомалӣ Раҳмон нақши Виктор Черномирдинро дар арсаи минтақа ва ҷахон низ намоён арзёбӣ карда, доир ба саҳми ӯ дар густариши муносибот бо Тоҷикистони соҳибистиқлол изхор дошт: -"Дар кишвари мо саҳми бузурги Виктор Степановичро дар таҳкими ҳамшарикии стратегии Тоҷикистону Русия ҳамеша дар ёд доранд. Мо доимо, хусусан дар солҳои вазнин, кӯмаку дастгирии беғаразонаи ӯро эҳсос мекардем".
Сарвари давлати Тоҷикистон Эмомалӣ Раҳмон аз Президенти Федератсияи Русия Дмитрий Медведев хоҳиш намудааст, ки ҳамдардии самимии ӯро ба аҳли хонавода ва наздикони шодравон бирасонад.
Дар ин бора ба АМИТ "Ховар" аз Хадамоти матбуоти Президенти Ҷумҳурии Тоҷикистон иттилоъ доданд.
Баёни ақида (0) Санаи нашр: №: Мутолиа карданд: 3619