президент
Машварати корӣ дар ҳузури Сарвари давлат
6 декабри соли 2010 Президенти Ҷумҳурии Тоҷи-кистон Эмомалӣ Раҳмон бо масъулони Ҳукумати мамлакат ва Дастгоҳи иҷроияи Сарвари давлат, роҳбарони вазорату идораҳои мамлакат ва дигар шахсони масъул машварати корӣ доир намуд.
Дар машварат масоили омодагӣ ба ҷамъбасти натиҷаҳои фаъолият дар соли равон, аз ҷумла рафти иҷрои буҷети давлатӣ ва дигар масоили мавриди таваҷҷӯҳ баррасӣ ёфтанд.
Зимни гузориши вазири молия Сафаралӣ Наҷмиддинов доир ба рафти иҷрои буҷети давлатӣ, аз ҷумла иттилоъ дода шуд, ки ба ҳолати 1-уми декабри соли равон иҷрои нақшаи даромадҳо дар ҳаҷми 98,5% таъмин гаштааст, ки ин ба 4,4 миллиард сомонӣ баробар аст. Ба иттилои ӯ, маблағи воридшуда нисбат ба ҳамин давраи соли гузашта 702 миллион сомонӣ ё худ 19% зиёд мебошад.
Президенти мамлакат Эмомалӣ Раҳмон дар назди роҳбарони сохторҳои масъул доир ба таъмини пурра ва босифати иҷрои буҷети давлатии мамлакат вазифаҳои мушаххас гузошт.
Дар машварат ҳамчунин масоили вобаста ба тезондани киштукори тирамоҳӣ ва мубориза бо фасоду ҷинояткорӣ баррасӣ шуданд.
Сарвари давлат Эмомалӣ Раҳмон ба масъулони дахлдор доир ба ҷоннок ва босамар намудани корҳо дастуру ҳидоятҳо дод.
Баёни ақида (0) Санаи нашр: №: Мутолиа карданд: 3709
