номаҳо
«Модели кишоварзии бехатар дар Тоҷикистон» дастрас гардид
Чанде пеш асари олими шинохта Нозимҷон Нидоев бо номи «Моде-ли кишоварзии бехатар дар Тоҷикистон» ба табъ расид. Он аз дастовардҳои арзишманд маҳсуб ёфта, дар рушди илми кишоварзии миллӣ мусоидат мекунад.
Муаллиф зимни таҳлилу баррасӣ қайд мекунад, ки рушди иқтисодиёти миллӣ, аз ҷумла соҳаи кишоварзии Тоҷикистон, дар роҳи таъмини истиқлолияти озуқавори бештар на аз омилҳои беруна, балки аз омилҳои дохилӣ вобаста мебошад. Аз ҳамин хотир, «кишоварзии бехатар» дар сатҳи соҳаи агросаноатӣ ҳамчун як қисми «иқтисоди нави миллӣ» баҳогузорӣ карда мешавад.
Ба андешаи муҳаққиқ мафҳуми нави «кишоварзии бехатар» барои пайдо шудани дигар мафҳумҳои нав, ба мисли «иқтисодиёти нав», «кишоварзии нав» шароиту имконият фароҳам меоварад. Маҳз кишоварзии бехатар ҳамчун омили асосии таъминоти истиқлолияти озуқавории кишвар хизмат менамояд.
Кишоварзии бехатар на танҳо даромади баланд ва доимӣ, балки имконияти дар ҳама фаслҳои сол, дар ҳама минтақаҳои ҷумҳурӣ ва бо ҳама намуди маводи озуқаворӣ таъмин кардани аҳолӣ мебошад. Таъминоти пурраи аҳолӣ бо масолеҳи кишоварзӣ хело мушкил аст ва аз ин рӯ ба кишоварзии бехатар бояд ҳамчун ба ҳунар ва илм муносибат намуд.
Ҳамчун ҳунару анъанаҳои бобоён он бояд тавассути фарзандон идома ёбад. Яъне амал бояд ҳамчун «манифести миллӣ» аз насл ба насл гузарад. Ҳол он ки амалиётҳои кишоварзӣ фақат такрор мешаванд.
Дар шароити муносибатҳои бозорӣ таъмини истиқлолияти озуқаворӣ барои Тоҷикистони дорои қувваи зиёди корӣ мушкилоти аввалиндараҷа ба шумор меравад. Бешак, ворид намудани технологияи муосир дар соҳаи кишоварзӣ ба худтаъминкунии озуқаворӣ баъзе шароиту имкониятҳоро фароҳам меоварад, вале то ҳол ин самт низ кам таҳқиқ ва таҳлил шудааст.
«Аз ин рӯ соҳаи кишоварзӣ сарчашма ва асоси ибтидоии ҳифз ва рушди тамаддуни инсонӣ мебошад», -ба хулоса меояд муҳаққиқ.
Монография аз 4 боб иборат буда, «Асосҳои илмӣ- методологии кишоварзии муосир, «Омилҳои рушди кишоварзии бехатар бо назардошти хусусиятҳои шароити табиии кишвар», «Баҳогузории кишоварзии бехатар ва модели тоҷикии тараққиёти он» ва «Ташкили иқтидори сармоягузорӣ- самти асосии дурнамои рушди кишоварзии бехатар» ном доранд. Муаллиф дар асоси таҳқиқоти илман асоснокшуда бартарии «кишоварзии бехатар»-ро дар ин бобҳо нишон медиҳад.
А. РАҲИМ
Баёни ақида (0) Санаи нашр: №: Мутолиа карданд: 3717
