мулоқотҳо
Вохӯрии Эмомалӣ Раҳмон бо Рамазон Абдулатифов
12 ноябр Президенти Ҷумҳурии Тоҷикистон Эмомалӣ Раҳмон Сафири фавқулодда ва мухтори Федератсияи Русия дар Тоҷикистон Рамазон Абдулатифовро бинобар анҷом ёфтани мӯҳлати ваколати дипломатиаш дар кишвари мо ба ҳузур пазируфт.
Сардори давлат Эмомалӣ Раҳмон ба Рамазон Абдулатифов баҳри фаъолияти пурсамари дипломатиаш дар таҳкими дӯстӣ ва ҳамкории миёни Тоҷикистону Русия арзи сипос карда, заҳматҳои арзандаи ӯро бо мукофоти баланди давлатӣ - ордени Дӯстӣ қадрдонӣ намуд.
Рамазон Абдулатифов аз ин мукофоти олӣ изҳори сарфарозӣ карда, ба нақши бевоситаи Президенти Ҷумҳурии Тоҷикистон Эмомалӣ Раҳмон дар густариши робитаҳои дуҷониба ва тасмимҳои минтақавию байналмилалии Тоҷикистону Русия, хусусан дар ҳаллу фасли масоили амнияти минтақавӣ баҳои баланд дод.
-Нақши бузурги Тоҷикистон ва Сардори он Эмомалӣ Раҳмонро дар минтақаи Осиёи Марказӣ, хусусан дар ҳаллу фасли масоили вобаста ба Афғонистон ҳоло то охир дарк накардаанд, - таъкид дошт Рамазон Абдулатифов.
ӯ ҳамчунин таъкид намуд, ки минбаъд низ баҳри таҳкиму густариши муносибатҳои ҳамкорӣ ва ҳамшарикии стратегии Тоҷикистону Русия саҳми худро дареғ нахоҳад дошт. Ба андешаи ӯ Русия бояд тариқи амалӣ намудани лоиҳаҳои бузургҳаҷми инвеститсионӣ таҳкурсии иқтисодии робитаҳои ҳарбӣ-сиёсии худро бо Тоҷикистон мустаҳкам намояд.
Зимни сӯҳбат инчунин оид ба дурнамои ҳамкории гуногунҷанбаи Тоҷикистону Русия ва роҳҳои таъмиқу тавсеаи бештари робитаҳо гуфтугӯи судманд сурат гирифт.
Баёни ақида (0) Санаи нашр: №: Мутолиа карданд: 7887
