фармонҳои президент
Фармони Президенти Ҷумҳурии Тоҷикистон
дар бораи тасдиқи барномаи ислоҳоти судӣ – ҳуқуқӣ дар ҷумҳурии тоҷикистон барои солҳои 2011 – 2013
Мутобиқи моддаи 69 Конститутсияи (Сарқонуни) Ҷумҳурии Тоҷикистон ва бо мақсади таҳкими минбаъдаи ҳокимияти судӣ, инчунин баланд бардоштани нақши он дар ҷомеа ф а р м о н м е д и ҳ а м :
1. Барномаи ислоҳоти судӣ – ҳуқуқӣ дар Ҷумҳурии Тоҷикистон барои солҳои 2011 - 2013 тасдиқ карда шавад.
2. Иҷрои талаботи Барномаи мазкур ба зиммаи Суди конститутсионии Ҷумҳурии Тоҷикистон, Суди Олии Ҷумҳурии Тоҷикистон, Суди Олии иқтисодии Ҷумҳурии Тоҷикистон, Шӯрои адлияи Ҷумҳурии Тоҷикистон, Вазорати адлияи Ҷумҳурии Тоҷикистон, Прокуратураи генералии Ҷумҳурии Тоҷикистон, Агентии назорати давлатии молиявӣ ва мубориза бо коррупсияи Ҷумҳурии Тоҷикистон ва гурӯҳҳои корӣ оид ба таҳияи лоиҳаи санадҳои қонунгузории дахлдор гузошта шавад.
3. Назорати иҷрои Фармони мазкур ба зиммаи Мушовири давлатии Президенти Ҷумҳурии Тоҷикистон оид ба сиёсати ҳуқуқӣ гузошта шавад.
Президенти
Ҷумҳурии Тоҷикистон Эмомалӣ РАҲМОН
ш. Душанбе, 3 январи соли 2011, № 976
Шарҳи фармон
3 январи соли 2011 бо Фармони Президенти Ҷумҳурии Тоҷикистон Барномаи ислоҳоти судӣ – ҳуқуқӣ дар Ҷумҳурии Тоҷикистон барои солҳои 2011- 2013 тасдиқ гардид. Барномаи мазкур идомаи ислоҳоти судӣ – ҳуқуқӣ дар Ҷумҳурии Тоҷикистон буда, дар заминаи Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон аз 24 апрели соли 2010 таҳия гардидааст.
Мақсад аз таҳияи Барномаи мазкур аз таҳкими минбаъдаи ҳокимияти судӣ, баланд бардоштани нақши суд дар таъмини волоияти қонун, ҳифзи ҳамаҷонибаи ҳуқуқу озодиҳои инсон, ҳимояи манфиатҳои қонунии давлат, корхонаҳо, муассисаҳо ва дигар ташкилотҳо, такмили сохторҳои судӣ ва тақвияти фаъолияти онҳо, беҳдошти вазъи моддию ҳуқуқии мақомоти судӣ ва судяҳо, инчунин мукаммал намудани қонунҳо иборат мебошад.
Тибқи ин Барнома такмилу тавсеаи сохтори мақомоти судӣ ва салоҳияти он, шаффофу мушаххас намудани вазифаҳо ва беҳдошти фаъолияти онҳо пешбинӣ шудааст. Ҳамзамон дар Барнома пешбинӣ гардидааст, ки дараҷаи баланди маҳорату малакаи касбӣ ва маърифати ахлоқӣ, дониши амиқи ҳуқуқӣ, одоби муоширати касбии судягӣ, адлу инсоф, беғаразӣ, ҳисси баланди эҳтиром ба халқу Ватан, Конститутсия ва қонунҳо, адолатнокию поквиҷдонӣ меъёри асосии муайянкунандаи шахсият ва фаъолияти ҳар як судя бошад ва хоста гирифтан, таъину интихоби судяҳо бояд аз рӯи ин талабот амалӣ карда шавад. Бо ин мақсад таҳия ва қабул намудани Кодекси одоби судяҳо низ дар назар дошта шудааст.
Ҳамчунин дар Барнома ба такмили қонунҳои марбута ва татбиқи якхелаи онҳо, бартараф намудани монеаҳои зиёдатӣ, сари вақт ва дар мӯҳлати кӯтоҳ баррасӣ ва ҳаллу фасл намудани парвандаҳо, роҳ надодан ба кашолкорӣ, осону камҳаҷм намудани кори судяҳо, танзими дақиқи масъалаи тобеияти идоравии парвандаҳои гражданӣ, иқтисодӣ, оилавӣ ва маъмурӣ, рушди расонидани ёрии ҳуқуқӣ ба иштирокчиёни мурофиа, такмили низоми иҷрои санадҳои судӣ, таъмини шаффофияти фаъолияти судҳо ва тавсеаи бештари ин раванд тавассути дар ин мақомот таъсис додани сомонаҳои интернетӣ ва дигар масоили марбути фаъолияти ҳокимияти судӣ аҳамияти махсус дода шудааст.
Таъмини иҷрои Барномаи мазкур тибқи нақшаи чорабиниҳо дар солҳои 2011 - 2013 пешбинӣ гардидааст.
Барномаи мазкур дар таҳкими минбаъдаи ҳокимияти судӣ, баланд бардоштани нақш ва мавқеи он дар ҷомеа, мустаҳкам гардидани мустақилияти судяҳо, зиёд шудани масъулияту ҷавобгарии онҳо ва таъмини минбаъдаи ҳифзи ҳуқуқу озодиҳои инсону шаҳрванд такони ҷиддие мебахшад.
Баёни ақида (0) Санаи нашр: №: Мутолиа карданд: 2597
