президент
Таваҷҷӯҳи муттасили
Сарвари давлат
ба вазъи Рашт
20 январи соли 2011 Президенти Ҷумҳурии Тоҷикистон Эмомалӣ Раҳмон бо масъулони Ҳукумати мамлакат, Дастгоҳи иҷроияи Сарвари давлат, роҳбарони вазорату идораҳои дахлдор ва дигар шахсони масъул машварати корӣ доир намуд.
Дар машварат масоили вобаста ба вазъи кунунии водии Рашт ва таъмини рушди минбаъдаи иҷтимоӣ, иқтисодӣ ва фарҳангии он ба таври муфассал баррасӣ шуданд. Сарвари давлат Эмомалӣ Раҳмон ба масъулон барои таъмини иҷрои барномаю нақшаҳои давлатӣ ва андешидани чораҳои иловагӣ супоришҳои мушаххас дод.
Аз ҷумла дастур дода шуд:
- ҳаҷми қарзҳои хурди бонкӣ ба соҳибкорони хурду миёнаи минтақа зиёд карда шуда, фоизи бозгардонии қарзҳо паст карда шавад;
- дар соли равон 64 синфхонаи иловагӣ барои мактабҳои ноҳияи Рашт сохта шуда, барои ба мактабҳои умумӣ табдил додани мактабҳои ибтидоӣ ва 9 – сола тадбирҳо амалӣ карда шаванд;
- 2,5 ҳазор дона китобҳои дарсӣ, ки намерасанд, давоми як ҳафта ба ҳамаи мактабҳои ноҳия дастрас карда шаванд;
- бунёд ва таҷдиди варзишгоҳи марказии ноҳияи Рашт бо 4 ҳазор ҷойи нишаст то ҷашни солгарди 20 – уми Истиқлолияти давлатии Тоҷикистон бо сифати баланд ба анҷом расонда шавад;
- сохтмони толори варзишии Филиали Донишгоҳи давлатии омӯзгории Тоҷикистон ба номи Садриддин Айнӣ ва як бинои нави таълимии он дар соли равон ва хобгоҳи дуюми донишҷӯён соли 2012 ба анҷом расонда шавад;
- матбааи ноҳия бо техникаю таҷҳизоти нав дар мӯҳлати кӯтоҳ таъмин карда шавад;
- ба театри халқии ноҳия либосҳои саҳнавӣ ва дастгоҳҳои тақвияти садо дастрас карда шаванд;
- шароити муосири дилхушӣ дар Боғи фарҳангиву фароғатии ноҳия муҳайё карда шавад;
- пахши пурра ва босифати мавҷҳои телевизион ва радиои ҷумҳуриявӣ таъмин гардад.
Ҳамчунин доир ба бунёди нерӯгоҳҳои хурди барқӣ, коргоҳҳои хурди истеҳсолӣ доир ба дӯхти либос, коркарди меваю сабзавот ва дигар маҳсулоти кишоварзӣ, зиёд кардани грантҳои ҳукуматӣ барои рушди ҳунармандии мардумӣ, таъмини шароити зарурии муосир дар муассисаҳои соҳаи тандурустӣ, навсозии роҳҳои маҳаллӣ, ба хоҷагиҳои кишоварзӣ дастрас кардани тракторҳо, испор, тухмипошак, дигар техникаву таҷҳизоти зарурӣ, тухмиҳои хушсифат, беҳсозии вазъи мелиоративии заминҳои обӣ ва азхуднамоии заминҳои нав, ҷудо кардани замин ба аҳолӣ барои сохтмони манзили истиқоматӣ ва кашидани хатҳои оби ошомиданӣ дастуру ҳидоятҳо дода шуданд.
Таъкид гардид, ки дар чаҳорчӯби таҷлили ҷашну идҳои миллӣ – Наврӯзи хуҷастапай, Рӯзи Ваҳдати миллӣ ва 20 – солагии Истиқлолияти давлатии Тоҷикистони азиз чорабиниҳои бошукӯҳи фарҳангию варзишӣ, ки ба баланд бардоштани ҳисси ифтихору сарфарозии мардум аз таъриху тамаддун ва давлату давлатдории миллии тоҷикон мусоидати фаъол мекунанд, ба роҳ монда шаванд.
Президенти Ҷумҳурии Тоҷикистон Эмомалӣ Раҳмон таъкид намуд, ки дар мӯҳлати 10 рӯз доир ба иҷрои дастуру супоришҳои имрӯза нақшаи мушаххаси чорабиниҳо бо мӯҳлатҳои муайян таҳия ва пешниҳод гардад ва рафти иҷрои барномаю нақшаҳои давлатӣ дар ин минтақа таҳти назорати доимӣ қарор дода шавад.
Баёни ақида (0) Санаи нашр: №: Мутолиа карданд: 3659