маориф
Ҳаҷми маоши устодон
дар асоси баҳои тестӣ ва баҳогузории инфиродӣ
муқаррар мешавад
Донишгоҳи техникии Тоҷикистон муассисаи бунёдии таҳсилоти олии техникии кишвар аст. Ҳар сол онро ҳудуди 1,5 ҳазор мутахассиси соҳаҳои гуногуни саноату сохтмон, энергетикаву нақлиёт ва технологияи иттилоотиву иртиботӣ, ки ба хоҷагии халқи мамлакат беш аз пеш заруранд, бо 54 ихтисос хатм мекунад. Аммо, оё сифати касбии онҳо ба талаботи замон ҷавобгӯст?
Бино ба иттилои Анвар Абдурасулов, ректори донишгоҳ, омодасозии мутахассисони ҳирфаии дар бозори меҳнат рақобатпазир ҳадафи ниҳоии муассиса буда, ба ин хотир соли 2010 тадбирҳои ҷиддӣ ва нишонрас андешида шуданд. Нахуст, дар заминаи филиалҳои донишгоҳҳои техникӣ ва технологии шаҳри Хуҷанд Донишкадаи политехникии Донишгоҳи техникии Тоҷикистон ва бо муттаҳидсозии коллеҷҳои техникӣ ва политехникӣ дар шаҳри Душанбе Коллеҷи техникии Донишгоҳи техникии Тоҷикистон ба фаъолият шурӯъ намуданд.
Ба андешаи ректор, тадбири дигаре, ки дар ин сол ба сифати таълим таъсири хуби чашмрас гузошт, истифодаи шеваҳои наву замонавии санҷиши сатҳи андӯзиши донишомӯзон, ба мисли санҷишҳои фосилавӣ ва истифода аз низоми кредитии таълим аст. Имсол ва минбаъд низ сифати фаъолияти устодон ва ҳаҷми маоши онҳо дар асоси санҷиши тестӣ ва баҳогузории инфиродӣ муқаррар мешавад.
-Чунин иқдом, - ёднишон гашт Анвар Абдурасулов, - ба пешгирии коррупсуя дар донишгоҳ мусоидат менамояд.
Хайринисои Расулӣ
Баёни ақида (0) Санаи нашр: №: Мутолиа карданд: 5538
