энергетика
Абдулло Ёров: «Дар фаъолияти ширкати «Барқи тоҷик» камбудиҳо бисёранд»
Ширкати саҳомию холдингии кушодаи "Барқи тоҷик" дар соли 2010-ум 14 миллиарду 614 миллион кВт.соат нерӯи барқ истеҳсол намуд, ки нисбат ба ҳамин давраи соли рафта 714 миллион кВт.соат зиёд аст.
Дар натиҷаи дуруст ба роҳ мондани реҷаи коркарди обанбори Норак сатҳи оби он то 19 октябри соли 2010 дар нишондоди 910,50 метр нигоҳ дошта шуд ва ин имконият дод, ки таъминоти аҳолии ҷумҳурӣ бо барқ дар моҳҳои ноябру декабр ба 10 - 12 соат расонида, 7 шаҳри ҷумҳурӣ бемаҳдудият бо барқ таъмин гардад. Соли 2009 агар дар давраи маҳдудсозии истифода аз нерӯи барқ ҷумҳурӣ дар як шабонарӯз 42,7 миллион кВт.соат нерӯи барқ гирифта бошад, дар соли 2010 ин рақам ба 48 - 50 миллион кВт.соат баробар шуд.
Дар давраи ҳисоботӣ дар муқоиса ба соли пеш аз истифодаи нерӯи барқ 337,5 миллион сомонӣ бештар маблағ ҷамъоварӣ шуд. Вале вобаста ба сари вақт пура пардохт нагардидани маблағи барқи истифодашуда ШСХК "Барқи тоҷик" ба ҳолати 1 январи соли 2011 аз андоз ба маблағи 292,5 миллион сомонӣ қарздор аст, ки аз ин қарзи асосӣ 204,6 миллион сомониро ташкил медиҳад.
Ба саволи «Чаро фаъолияти ҳама ширкатҳои барқӣ дар ҷаҳон фоидаовару азони «Барқи тоҷик» чунин нест», раиси ширкат посух дод, ки дар кори муассиса камбудиҳо ҳанӯз бисёранд. Қабл аз ҳама кадрҳои донишу қобилияти баланди тахассусӣ дошта намерасанд. Дар аттестатсияи ба қарибӣ гузаронидаамон 30 нафар назоратчии барқ ба талабот мувофиқ надониста, аз кор сабукдӯш ва ҳамин қадари дигар бо сатҳи пасти донишу фаҳмиш дар кор мононда шуд. Мо ҳоло барои ба тартиб даровардан ва рафъи камбудиҳо, ки аксаран аз солҳои пеш боқӣ мондаанд, кӯшишҳои зиёд ба харҷ медиҳем.
Неъматуллоҳи ЁРМУҲАММАД
Баёни ақида (0) Санаи нашр: №: Мутолиа карданд: 3779
