маориф
Ба фазои ягонаи таҳсилоти ҷаҳонӣ ворид мешаванд
Мӯминҷон Шарифов, ректори Донишгоҳи давлатии тиҷорати ҷумҳурӣ, ба хабарнигорон аз фаъолияти соли гузаштаи маъмурият сухан ронда, аз ҷумла зикр сохт, ки кулли биноҳои таълимӣ, синфхонаҳо ва хобгоҳи донишҷӯён таъмир гардида, мизу курсиҳоро нав карданд. Аз 425 компютер 150 адади он ба шабакаи интернет пайваст буда, дар хизмати толибилмон мебошад. Маркази тестӣ, ки 100 ҷойи нишаст дорад, бо 100 компютери нав, тахтаи электронӣ ва телевизор ҷиҳозонида шуд. Тӯли соли хониш зиёда аз 1000 китоби дарсӣ ва васоити таълимӣ харида, адади китобҳои китобхонаро ба 232066 нусха расонданд. Инчунин дорои 30 ҳазор нусха китоби электронӣ шуданд.
Бо мақсади амалӣ намудани ғояҳои асосии Консепсияи миллии таҳсилот ва стратегияи рушди таҳсилоти олӣ дар ҷумҳурӣ то соли 2015 дар ҳама факултаҳои рӯзонаи таҳсил ва қисман ғоибона татбиқи низоми кредитии таҳсилот ба анҷом расид. Аз ҷониби муаллимон 20 китоби дарсӣ ва васоити таълимӣ нашр шуда, 15 китоби дарсӣ ва комплексҳои таълимӣ- методӣ бо забони давлатӣ барои баррасӣ ба Вазорати маорифи ҷумҳурӣ пешниҳод ва ба чоп тавсия гардиданд, -афзуд сарвари донишгоҳ.
200 матлаби илмии устодон дар дохил ва хориҷи кишвар нашр шуд. Дар соли ҷорӣ яке аз мақсадҳои асосии донишгоҳ таъмини болоравии сифати таълиму тарбия ва воридшавӣ ба фазои ягонаи таҳсилоти ҷаҳонист.
Убайдуллои МУРОД
Баёни ақида (0) Санаи нашр: №: Мутолиа карданд: 5557
