президент
490 миллион сомонӣ дар моҳи аввал
7 феврал Президенти Ҷумҳурии Тоҷикистон Эмомалӣ Раҳмон бо масъулони Ҳукумати мамлакат ва Дастгоҳи иҷроияи Сарвари давлат, роҳбарони як қатор вазорату идораҳо ва дигар шахсони дахлдор машварати корӣ доир намуд.
Дар машварат нишондодҳои рушди иҷтимоӣ-иқтисодии кишвар дар моҳи январи соли равон, ҷараёни киштукори зироатҳои кишоварзӣ, таъмини фаровонӣ дар бозори истеъмолӣ, вусъати корҳои ободонӣ ва беҳдошти вазъи таълиму тарбия дар муассисаҳои соҳаи маориф баррасӣ шуд.
Зимни баррасии нишондодҳои рушди иҷтимоӣ-иқтисодӣ, иттилоъ дода шуд, ки дар давоми як моҳ ба буҷети давлатӣ 490 миллион сомонӣ маблағ ворид шуд, ки ин 26,4 миллион аз нақша ва нисбат ба ҳамин давраи соли гузашта 128 миллион зиёд аст. Маоши кормандони соҳаҳои буҷетӣ ва нафақа сари вақт ва беқарздории сохторҳои давлатӣ пардохт мешаванд.
Сарвари давлат Эмомалӣ Раҳмон ба масъулони дахлдор доир ба рушди бемайлони иқтисодиёт, таъмини аҳолӣ ва корхонаҳои саноатӣ бо барқу газ, вусъат додани киштукори зироатҳои кишоварзӣ, таъмини фаровонӣ дар бозори истеъмолӣ, пешгирӣ аз болобарии сунъии нархи маҳсулоти ниёзи ҳаррӯзаи мардум, тақсимоти одилонаи заминҳои ҷудошуда ба аҳолӣ барои сохтмони манзил, ривоҷ додани корҳои созандагию ободонӣ ва кабудизорсозии муҳити зист супоришҳои мушаххас дод.
Президенти мамлакат Эмомалӣ Раҳмон таваҷҷӯҳи зиёд ба мушкилоти соҳаи маориф зоҳир намуда, барои ҷоннок намудани раванди таълиму тарбияи насли наврас ва таъмини иштироки пураи хонандагон дар дарсҳо ба масъулон дастуру ҳидоятҳо дод.
Баёни ақида (0) Санаи нашр: №: Мутолиа карданд: 3685