президент
Фазои сармоягузориро беҳтар намоем
Таҳти раёсати Эмомалӣ Раҳмон, Президенти Ҷум-ҳурии Тоҷикистон, ҷаласаи ҳафтуми Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ баргузор шуд.
Дар ҷаласаи навбатии шӯро рафти иҷрои қарорҳои қаблан қабулшуда, лоиҳаи Нақшаи чорабиниҳои Ҳукумати Ҷумҳурии Тоҷикистон дар бораи тақвият бахшидани раванди ислоҳоти иқтисодӣ оид ба беҳтар намудани фазои сармоягузорӣ дар Ҷумҳурии Тоҷикистон, лоиҳаи «Барномаи беҳтар намудани фазои сармоягузорӣ ва соҳибкорӣ дар соҳаи сохтмон барои солҳои 2011-2012» ва лоиҳаи рӯзномаи кории ҷаласаи ояндаи Шӯрои машваратӣ мавриди муҳокима қарор гирифтанд.
Дар кори ҷаласа аъзои Шӯрои машваратӣ ва шумораи зиёди даъватшудагон аз Ҳукумати мамлакат ва Дастгоҳи иҷроияи Президенти Ҷумҳурии Тоҷикистон, доираҳои соҳибкории кишвар ва ҳамчунин намояндагони кишварҳою созмонҳои мададрасони хориҷӣ иштирок намуданд.
Бояд ёдовар шуд, ки дар ҳайати Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ дар баробари роҳбарияти мақомоти дахлдори давлатӣ, ҳамчунин намояндагони сохторҳои соҳибкории мамлакат ва кишварҳою созмонҳои мададрасон фаъолият мекунанд.
Дар оғози ҷаласаи ҳафтум аз ҷониби Эмомалӣ Раҳмон, Президенти мамлакат - Раиси Шӯро, нахуст се нафар аъзои нави Шӯро муаррифӣ гардид. Инҳо, аз ҷониби бахши хусусии ватанӣ Файзалӣ Раҷабов, раиси Ассотсиатсияи сохтмончиёни Тоҷикистон, аз ҷониби сармоягузорони хориҷӣ Тан Шан Фу, раиси Шӯрои директорони Ҷамъияти дорои масъулияти маҳдуди "Ҷинфенг Тоҷикистон" ва Корхонаи муштараки "Зарафшон" ва аз ҷониби ташкилотҳои байналмилалии дуҷониба Рудолф Шох, роҳбари Намояндагии Дафтари ҳамкории байналмилалии Шветсария дар Тоҷикистон мебошанд.
Доир ба масъалаи якум - рафти иҷрои қарорҳои қаблан қабулшуда ва лоиҳаи Нақшаи чорабиниҳои Ҳукумати Ҷумҳурии Тоҷикистон дар бораи тақвият бахшидани раванди ислоҳоти иқтисодӣ оид ба беҳтар намудани фазои сармоягузорӣ дар Ҷумҳурии Тоҷикистон гузориши Давлаталӣ Саидов, котиби масъули Шӯро - раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон, андешаҳои Рудолф Шох, роҳбари Намояндагии Дафтари ҳамкории байналмилалии Шветсария дар Тоҷикистон, Гулбаҳор Маҳкамова, роҳбари Ассотсиатсияи миллии занони соҳибкори Тоҷикистон ва Андреа Даллолио, корманди масъули Раёсати рушди бахши хусусӣ ва молияи Бонки ҷаҳонӣ, шунида шуд.
Доир ба масъали дуюми рӯзнома - муаррифии "Барномаи беҳтар намудани фазои сармоягузорӣ ва соҳибкорӣ дар соҳаи сохтмон барои солҳои 2011-2012" маърӯзаи Файзалӣ Раҷабов, раиси Ассотсиатсияи сохтмончиёни Тоҷикистон ва андешаҳои Намоз Рабиев, директори Ҷамъияти дорои масъулияти маҳдуди "Хатлонстрой" ва оид ба самтҳои татбиқи барномаи мазкур гузориши Абдувалӣ Комилов, директори Агентии сохтмон ва меъмории назди Ҳукумати Ҷумҳурии Тоҷикистон, шунида шуд.
Ба Агентии сохтмон ва меъмории назди Ҳукумати Ҷумҳурии Тоҷикистон супориш дода шуд, ки лоиҳаи "Барномаи беҳтар намудани фазои сармоягузорӣ ва соҳибкорӣ дар соҳаи сохтмон барои солҳои 2011-2012"-ро мукаммал намуда, бо тартиби муқарраргардида, ба Ҳукумати Ҷумҳурии Тоҷикистон пешниҳод намояд.
Зимни баррасии масъалаи сеюм лоиҳаи рӯзномаи ҷаласаи ояндаи Шӯрои машваратӣ пешниҳод гардид, ки дар он масъалаи таҳия ва пешниҳоди лоиҳаи Қонуни Ҷумҳурии Тоҷикистон "Оид ба ҳамкории миёни давлат ва бахши хусусӣ" баррасӣ гардад.
Ҷаласаи ҳафтуми Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ бо суханронии Эмомалӣ Раҳмон, Президенти Ҷумҳурии Тоҷикистон - Раиси Шӯро, ҷамъбаст гардид.
Эмомалӣ Раҳмон, Сарвари давлат бо ёдоварӣ аз тадбирҳои судманди Ҳукумати Ҷумҳурии Тоҷикистон доир ба беҳтар намудани фазои сармоягузорӣ ва соҳибкорӣ, ки дар ҳамкорӣ бо бахши хусусӣ амалӣ мегарданд, аз ҷумла таъкид дошт, ки ин раванд минбаъд низ тадриҷан ва босубот идома меёбад.
Ба андешаи Эмомалӣ Раҳмон ҳадафи асосӣ аз таҳия ва пешниҳоди "Барномаи беҳтар намудани фазои сармоягузорӣ ва соҳибкорӣ дар соҳаи сохтмон барои солҳои 2011-2012" дастгирии истеҳсолкунандагони ватании масолеҳи сохтмонӣ ва бинокорони Тоҷикистон аст.
Дар хусуси лоиҳаи Қонуни Ҷумҳурии Тоҷикистон "Оид ба ҳамкории миёни давлат ва бахши хусусӣ" Эмомалӣ Раҳмон, Президенти мамлакат, пешниҳод намуд, ки он дар ҳамкорӣ бо намояндагони бахши хусусӣ, коршиносони варзидаи шарикони хориҷӣ доир ба рушд ва бо назардошти таҷрибаи кишварҳои пешрафта то охири соли равон таҳия ва ба ҷаласаи Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ пешниҳод карда шавад.
Баёни ақида (0) Санаи нашр: №: Мутолиа карданд: 3895
