президент
Қазияи барқ баррасӣ гардид
7 апрел Эмомалӣ Раҳмон, Президенти Ҷумҳурии Тоҷикистон, бо масъулони Ҳукумати мамлакат ва Дастгоҳи иҷроияи Сарвари давлат доир ба вазъи таъмини аҳолӣ бо нерӯи барқ машварати корӣ доир намуд.
Доир ба ин мавзӯъ гузориши Гул Шералӣ, вазири энергетика ва саноат ва Абдулло Ёров, раиси ШСХК "Барқи Тоҷик", шунида шуд.
Иттилоъ дода шуд, ки сабаби асосии норасоии нерӯи барқ паст шудани ҳарорати ҳаво дар моҳҳои марту апрел, кам гаштани ҳаҷми оби дарёи Вахш ва ба ҳадди бӯҳронӣ поён омадани сатҳи об дар обанбори нерӯгоҳи Норак аст. Чунонки зикр гардид, то ба ин ҳадд номусоид омадани обу ҳаво дар фасли баҳор ва боло нарафтани ҳарорат аз солҳои 30-юми асри гузашта бори нахуст ба назар мерасад. Таъкид гардид, ки вазъи барқтаъминкунӣ дар мамлакат танҳо дар ҳолати аз 25-30 дараҷа боло рафтани гармии ҳаво беҳтар мегардад.
Эмомалӣ Раҳмон, Сарвари давлат, ба масъулони дахлдор дастур дод, ки барои беҳ намудани вазъи барқтаъминкунии аҳолӣ аз ҳамаи имкону захираҳои мавҷуда истифода баранд. Аз тамоми истифодабарандагони нерӯи барқ даъват карда шуд, ки аз он сарфакорона истифода баранд.
Ҳамчунин таъкид гардид, ки овозаҳои иғвоангези дар миёни мардум паҳншаванда, ки гӯё Ҳукумати Ҷумҳурии Тоҷикистон дар ҳамин ҳолат ба Ҷумҳурии Исломии Покистон нерӯи барқ мефурӯшад, ҳеҷ асоси воқеӣ надорад, зеро айни ҳол миёни Тоҷикистону Покистон хатти интиқоли нерӯи барқ вуҷуд надорад.
Ба роҳбарияти сохторҳои масъули давлатӣ дастур дода шуд, вазъи мавҷударо ба мардуми шаҳру навоҳӣ ва деҳоти кишвар дуруст фаҳмонанд.
Баёни ақида (0) Санаи нашр: №: Мутолиа карданд: 3601
