илм
Оё дунё ба охир мерасад?
Нишасти матбуотии Академияи илмҳои ҷумҳурӣ бидуни муаррифии фаъолияти соҳа, бо пурсиши намояндагони ВАО ва посухи масъулон сурат гирифт.
Бино ба посухи академик Маҳмадшо Илолов, Президенти Академияи илмҳои ҷумҳурӣ, давоми ин семоҳа низ дар радифи корҳои таҳқиқӣ таҷдиди сохтори идории ин муассисаи илмии кишвар идома ёфт. Тибқи қарорҳои Ҳукумат бар асари муттаҳидсозии чанд пажӯҳишгоҳ институтҳои нави геология, сохтмони ба заминҷунбӣ тобовар ва сейсмология; ботаника, физиология ва генетикаи растаниҳо; иқтисодиёт ва демография; забон , адабиёт, шарқшиносӣ ва мероси хаттӣ; фалсафа, сиёсатшиносӣ ва ҳуқуқ таъсис ёфтанд ва сарварони онҳо низ таъйин гаштанд. Аз ҷумла рӯзи гузашта Акбар Турсунов, файласуфи шинохта, директори Пажӯҳишгоҳи забон, адабиёт, шарқшиносӣ ва мероси хаттӣ таъйин шуд.
Устод Акбар Турсунов, дар нишаст ба пурсиши хабарнигорон иброз дошт, ки бо фаъолияти институт шинос шуда, дурнамои кори онро тарҳрезӣ намудаанд. Ба андешаи мавсуф дар пажӯҳишгоҳ корҳои илмии ҷолиб зиёданд, ки онҳо минбаъд низ идома дода мешаванд. Дар институт ҳеҷ гуна тағйироти кадрӣ ба амал намеояд, чун мутахассисон намерасанду дарёфти истеъдод ва ҳосили таҷриба ҳам кори осон нест, азм дорад муҳаққиқонро сарҷамъ намуда, айни замон ҷавононро ба кор ҷалб созад. Инчунин корҳои таҳқиқии пажӯҳишгоҳро тадриҷан ба сатҳи талаботи меъёрҳои ҷаҳонӣ мувофиқ намояд.
Роҷеъ ба фаъолияти пажӯҳишгоҳҳои дигар низ саволҳо буданд. Пурсише, ки низ боиси таваҷҷӯҳи ҳозирон гашт, андешаи
дар шабакаи интернетӣ паҳншудаи соли 2012 қатъ гардидани ҳаёт дар рӯи Замин буд. Магар дунё ба охир мерасад ва дар ин мавзӯъ олимони тоҷик чи гуна таҳқиқот доранд?
Тибқи посухи коршиносони пажӯҳишгоҳи физика ва геология, сохтмони ба заминҷунбӣ тобовар ва сеймсмология, хавфи он зилзилаву вулқон ва тӯфонҳои баҳрие, ки дар Ҷопон ва кишварҳои дигар ба назар мерасад, ҳеҷ гоҳ дар Тоҷикистон мушоҳида нашудааст ва минбаъд низ нахоҳад шуд, зеро иқлими мо мутлақо дигар аст. Аммо ба андешаи Акбар Турсунов, доктори илмҳои фалсафа, масъалаи ба охиррасии дунё проблемаи танҳо ин ё он соҳаи илм нест. Ҳатто омилҳои зиёди иҷтимоиву сиёсӣ ҳам, мисли ҷанги ҳастаии ду кишвари абарқудрат метавонад боиси маҳви сайёра шавад. Омили иҷтимоии афзоиши бемайлони аҳолии Замин ва ё нарасидани захираҳои хӯрокворӣ метавонад боиси ҷанги ҳамагонӣ ва ҳалокати башар гардад. Инчунин мушкилоти кайҳонии ба миёномада, яъне бархӯрди Замин бо астероид ва кометаҳо низ эҳтимоли маҳви Заминро имконпазир мегардонад. Илм ҳаракати кометаҳоро омӯхта, роҳҳои пешгирии бархӯрд бо онҳоро муайян кард. Ин гуна хатарҳо ҳамеша вуҷуд доранд ва онҳоро инсоният метавонад пешгирӣ намояд, агар ҳамеша аз паи кор бошад.
Хайринисои Расулӣ
Баёни ақида (0) Санаи нашр: №: Мутолиа карданд: 5352