президент
Аз нерӯи барқ ва об сарфакорона истифода барем
Нимаи дуюми рӯзи 20 апрел Эмомалӣ Раҳмон, Президенти Ҷумҳурии Тоҷикистон, бо роҳбарону масъулони вазорату идораҳо, мақомоти иҷроияи ҳокимияти давлатии вилоятҳо ва шаҳру навоҳӣ машварати корӣ доир намуд.
Дар машварат вазъи молиявӣ дар семоҳаи аввали соли равон, вусъати киштукори баҳорӣ, масоили таъмини амнияти озуқавории кишвар ва омодагӣ ба истиқболи сазовори солгарди 20-умини Истиқлолияти давлатии Тоҷикистон баррасӣ шуд.
Тавре зикр гардид, дар се моҳи аввали соли равон пешравиҳо дар ҳамаи соҳаҳо нисбат ба ҳамин давраи соли гузашта ба назар расида, афзоиши маҷмӯи маҳсулоти дохилӣ 6,5% -ро ташкил дод ва ба 4,4 миллиард сомонӣ баробар шуд. Ба буҷети давлатӣ то 1 апрели соли равон 1 миллиарду 472 миллион сомонӣ ворид шуда, нақшаи даромадҳо ба он 107% иҷро гардид. Ин нишондод нисбат ба соли гузашта 500 миллион сомонӣ зиёд аст.
Дар баробари ин таъкид гардид, ки қисми хароҷоти буҷет низ рӯ ба афзоиш дорад. Аз ин рӯ аз роҳбарони тамоми сохторҳои марбута талаб карда шуд, ки барои афзун намудани нишондодҳои истеҳсолӣ дар соҳаҳои афзалиятноки иқтисоди миллӣ, аз ҷумла саноат, энергетика, кишоварзӣ ва ғайра ва ба ин васила таъмин намудани рушди иҷтимоию иқтисодии кишвар тадбирҳои муассир андешанд.
Супоришҳои мушаххас доир ба вусъат додани киштукори баҳорӣ, васеъ ба роҳ мондани кишти такрорӣ, истифодаи босамар аз заминҳои обӣ, азхуднамоии заминҳои нав ва муҳайё кардани ҷойҳои корӣ дода шуд.
Бори дигар таъкид гардид, ки аз нерӯи барқ ва захираҳои обӣ сарфакорона ва самаранок истифода баранд.
Дар назди масъулон, ҳамчунин доир ба истиқболи арзанда аз солгарди 20-умини Истиқлолияти давлатии Тоҷикистон вазифаҳои мушаххас гузошта шуд.
Баёни ақида (0) Санаи нашр: №: Мутолиа карданд: 3718
