президент
Арзишмандтарин ҷашни миллиро сазовор истиқбол гирем
26 апрел Эмомалӣ Раҳмон, Президенти Ҷумҳурии Тоҷикистон, бо масъулони Ҳукумати кишвар, Дастгоҳи иҷроияи Сарвари давлат, роҳбарони вазорату идораҳои дахлдор ва дигар шахсони масъул доир ба омодагӣ ба ҷашни солгарди 20-умини Истиқлолияти давлатии Тоҷикистон машварати корӣ анҷом дод.
Доир ба рафти омодагӣ ба истиқболи шоистаи ҷашни 20 - солагии Истиқлолияти давлатии Тоҷикистон нахуст гузориши Руқия Қурбонова, муовини Сарвазири кишвар, шунида шуд.
Эмомалӣ Раҳмон, Сарвари давлат, масъулони дахлдорро вазифадор намуд, ки рафти иҷрои Нақшаи чорабиниҳои Ҳукумати Ҷумҳурии Тоҷикистонро доир ба омодагӣ ба ин ҷашни фархунда мавриди омӯзишу таҳлил қарор дода, барои дар сатҳу сифати зарурӣ ба роҳ мондани корҳо чораҳои муассир андешанд.
Таъкид гардид, ки барои тарғибу ташвиқи арзишҳои волои озодӣ, давлатдории миллӣ, истиқлоли давлатӣ, ваҳдату ягонагӣ, бунёдкорию созандагӣ, ғояҳои ватандӯстию ватанпарварӣ ва баланд бардоштани ҳисси худшиносию худогоҳӣ ва ифтихору сарфарозӣ аз давлатдории мустақил бояд аъзои Шӯрои ҷамъиятӣ, Ҳаракати ваҳдати миллӣ ва эҳёи Тоҷикистон ва зиёиёни кишвар васеъ сафарбар гарданд.
Ҳамчунин таъкид гардид, ки чорабиниҳои фарҳангию фароғатӣ, варзишӣ ва солимгардонии аҳли ҷомеа бояд дар тамоми гӯшаю канори кишвар бахшида ба ин санаи пурифтихор васеъ ба роҳ монда шаванд. "Ба тарғиби тарзи ҳаёти солим ва истифодаи босамар аз иншооти варзишӣ низ бояд таваҷҷӯҳи ҷиддӣ зоҳир карда шавад", таъкид намуд Эмомалӣ Раҳмон, Сарвари давлат.
Изҳори боварӣ карда шуд, ки мардуми Тоҷикистон солгарди 20-умини Истиқлолияти давлатии кишварро, ки аз арзишмандтарин ҷашнҳои миллии мо ба шумор меравад, бо дастовардҳои пурарзиши бунёдкорию созандагӣ ва ваҳдату ягонагӣ истиқбол мегиранд.
Баёни ақида (0) Санаи нашр: №: Мутолиа карданд: 3616