маориф
ДТТ: Маркази нави муҳандисиву техникӣ ба кор шурӯъ кард
Анвар Абдурасулов, ректори Донишгоҳи техникии Тоҷикистон дар нишасти матбуотӣ ба намояндагони ВАО аз ин хусус мужда расонида, мусоидат намуд, ки онҳо дар фарҷоми нишаст ба озмоишгоҳ ташриф оранд. Саҳни марказ васеъ буда, дар он даҳҳо дастгоҳҳои муосири коркарди қисмҳои хурди мошинҳои гуногуни нақлиётӣ насб шудааст ва бо ёрии компютерҳо идора мешавад. Дастгоҳҳо аз корхонаҳои Ҳиндустон харидорӣ шуда, васли онҳо низ бо ёрии мутахассисони ин кишвар сурат гирифтааст. Инчунин бо дастгирии Ҳукумати Ҳиндустон устодони донишгоҳ дар корхонаҳои шаҳри Бангалор барои ошноӣ бо кори дастгоҳҳо бозомӯзӣ ва такмили ихтисос намудаанд.
Бино ба иттилои ректор марказ айни замон имкон дорад, ки дар баробари баргузории машғулиятҳои амалии муҳандисони оянда ва озмоишҳои таҳқиқотии устодон, макони бозомӯзиву такмили ихтисоси мутахассисони корхонаҳои саноатии кишвар, мисли "Алюминийи тоҷик" ва "Тоҷиктекстилмаш" бошад.
Тавре ки Анвар Абдурасулов хотирнишон шуд, ба кор оғоз намудани Маркази муҳандисиву механикӣ гоми навбатӣ дар такмили сохтории донишгоҳ буда, омодасозии мутахассисони ҳирфаии замони нав бидуни он ғайриимкон аст. Аз ин лиҳоз мавсуф тасмим гирифта, ки дар пояи факултаҳои мавҷуда минбаъд чандин донишкада таъсис диҳад, то заминаҳои таълимиву таҷрибавии онҳо ҷавобгӯи талаботи замон гарданд. Ва корҳои ободониву сабзкорие, ки шогирдону устодони донишгоҳ дар шаҳраки донишҷӯён, собиқ шаҳраки Политехникум, оғоз бахшиданд, ба ҳамин хотир аст.
Хайринисои Расулӣ
Баёни ақида (0) Санаи нашр: №: Мутолиа карданд: 5559
