мулоқотҳо
Намояндаи ИМА ба нақши Тоҷикистон дар минтақа баҳои баланд дод
20 май Эмомалӣ Раҳмон, Президенти Ҷумҳурии Тоҷикистон, Марк Гроссман - намояндаи Махсуси маъмурияти Иёлоти Муттаҳидаи Амрико оид ба Афғонистон ва Покистонро қабул кард.
Дар мулоқот масоили ҳамкории Тоҷикистону Амрико баррасӣ шуданд. "Тоҷикистон Иёлоти Муттаҳидаи Амрикоро яке аз шарикони муҳими худ дар арсаи байналмилалӣ медонад ва ҳамеша кӯшиш ба харҷ медиҳад, ки бо он дар асоси усулҳои баробарманфиатӣ ҳамкориҳои пойдору мутақобилан судманд дошта бошад", -гуфт Эмомалӣ Раҳмон зимни сӯҳбат.
Марк Гроссман нақши сиёсӣ ва мавқеи ҷуғрофии Тоҷикистонро дар минтақаи Осиёи Марказӣ басо муҳим номида, ба Эмомалӣ Раҳмон ва мардуми кишвар барои мусоидати фаъол ба нерӯҳои эътилофӣ ва ба барқарорсозии оромию субот дар Афғонистон арзи сипос намуд.
Зимни сӯҳбати тӯлонӣ таваҷҷӯҳи бештар ба роҳҳои ҳамгироии ду кишвар барои барқарорсозии амнияту субот дар Афғонистон ва иқтисодиёту иҷтимоиёти ин кишвари азиятдида, омодасозии кадрҳои сатҳи муосир барои сохторҳои гуногуни он, аз ҷумла сохторҳои қудратию мақомоти ҳифзи ҳуқуқ, зоҳир гардид.
Мусоидат ба рушди ҳамкории иқтисодӣ-тиҷоратӣ дар минтақа низ чун омили муҳими таҳкими суботи сиёсӣ аз тариқи болобарии сатҳи некӯаҳволии мардум аз мавзӯъҳои асосии сӯҳбат буд.
Ҳарду ҷониб омодагии худро барои дастгирии мушаххас аз татбиқи лоиҳаҳои муҳими зербиноӣ, аз ҷумла дар бахшҳои бунёди нерӯгоҳҳои барқӣ, хатҳои интиқоли нерӯи барқ, роҳҳои оҳану мошингард ва таъмини робитаи мунтазами миёни Осиёи Марказӣ ва Осиёи Ҷанубӣ, таъкид намуданд.
Таваҷҷӯҳи зиёд ба пешгирӣ аз хатари паҳншавии терроризму ифротгароӣ ва қочоқи маводи мухаддир аз Афғонистон ва таҳкими ҳифзи сарҳади миёни Тоҷикистону ин кишвар зоҳир гардид.
Баёни ақида (0) Санаи нашр: №: Мутолиа карданд: 2058
