барқияҳо
Барқияи табрикии Эмомалӣ Раҳмон ба Дмитрий Медведев
Эмомалӣ Раҳмон, Президенти Ҷумҳурии Тоҷикистон, ба унвонии Дмитрий Медведев, Президенти Федератсияи Русия, барқияи табрикӣ ирсол намуд, ки дар он аз ҷумла омадааст:
Дмитрий Анатолевичи мӯҳтарам,
Бо қаноатмандии комил Шумо ва тамоми мардуми Русияро ба муносибати таҷлили ҷашни фархундаи 20-умин солгарди қабули Эъломия оид ба Истиқлолияти давлатии Федератсияи Русия самимона табрик менамоям.
Боиси хушҳолист, ки Русияи бародар дар давраи сипаришуда дар рушди иқтисод, баланд бардоштани сатҳи некӯаҳволии мардум ва тавсеаи фарҳангу маориф ба комёбиҳои назаррас ноил гардидааст. Давлати Русия дар арсаи байналмилалӣ ҷойгоҳи устувору мақоми баланд дошта, пайваста баҳри таъмини амният ва сулҳу субот дар ҷаҳон талош меварзад.
Дар чаҳорчӯби Иттиҳоди Давлатҳои Мустақил Федератсияи Русия ташаббускори корҳои нек аст, ки ба ҳамгироӣ ва таҳкими минбаъдаи муносибатҳои миёни давлатҳои аъзо равона гардидаанд.
Мо ҳамчун дӯстони қадрдони Шумо аз ин дастовардҳо хушнудем.
Бо қаноатмандии амиқ мехоҳам зикр намоям, ки муносибатҳои Тоҷикистону Русия, ки дар асоси анъанаҳои қавии дӯстиву эҳтироми ҳамдигар асос ёфтаанд ва решаҳои таърихии бисёрасра доранд, ба манфиати ҳарду давлат ва халқҳои онҳо бемайлон инкишоф меёбад. Мо омода ҳастем, ки ин дастоварди арзишмандро бо мӯҳтавои нави ҷавобгӯи талаботи замони нав ғанӣ гардонем.
Ман бовар дорам, ки сафари давлатии қарибулвуқӯи Шумо ба Тоҷикистон ба густариш ва таҳкими ҳамкориҳои мутақобилан судманди дуҷониба такони нав мебахшад.
Мехоҳам Шуморо бовар кунонам, ки ҷониби мо барои расидан ба ин ҳадафҳои нек аз тамоми имкониятҳо истифода хоҳад кард.
Воқеаи неки имрӯза ба ман имконият фароҳам меорад, ки ба Шумо, Дмитрий Анатолевичи мӯҳтарам, саломатии комил, хушбахтӣ, комёбиҳо ва ба халқи бузурги рус шодмонӣ, сулҳ ва шукуфоӣ орзу намоям.
Баёни ақида (0) Санаи нашр: №: Мутолиа карданд: 3752
