мулоқотҳо
Вохӯрии Эмомалӣ Раҳмон
бо Барбара Прамер
Дар шаҳри Вена Эмомалӣ Раҳмон, Сарвари давлати Тоҷикистон, бо Барбара Прамер, Раиси Порлумони Австрия, мулоқот намуд. Дар мулоқот масоили вобаста ба таҳкими заминаи ҳуқуқию қарордодии ҳамкории Тоҷикистону Австрия ва густариши робитаҳои байнипорлумонӣ баррасӣ шуданд.
Нимаи дуюми рӯз Эмомалӣ Раҳмон, Президенти Ҷумҳурии Тоҷикистон, ба шаҳри Сент-Пёлтени Австрия ташриф оварда, бо фаъолияти ширкати гидроэнергетикии Войс Ҳайдро (VOITH HYDRO), ки бо давлатҳои Амрикою Аврупо ва дигар минтақаҳои ҷаҳон ҳамкории густурда дорад, аз наздик шинос шуд.
Зимни сӯҳбат бо Эмомалӣ Раҳмон, Сарвари давлати Тоҷикистон, Леополд Ҳинингер, президенти ширкати мазкур ва аъзои Шӯрои мудирони он омодагӣ ва ҳавасмандии худро ба ташкил ва густариши ҳамкорӣ бо Тоҷикистон таъкид намуданд.
8 июн ҳайати Ҳукумати Ҷумҳурии Тоҷикистон дар пойтахти Австрия - шаҳри Вена дар Форуми умумиҷаҳонии иқтисодӣ иштирок намуд.
Барои иштирок дар ин ҳамоиши бузурги ҷаҳонӣ сарони давлатҳою ҳукуматҳо ва роҳбарони воломақом аз кишварҳои сершумори ҷаҳон, роҳбарият ва намояндагони созмонҳои байналмилалию минтақавӣ дар шаҳри Вена ҷамъ омаданд.
Тавре аён мегардад, ҷаҳду талошҳои бисёрсолаи Эмомалӣ Раҳмон - Президенти Тоҷикистон ва Ҳукумати Ҷумҳурии Тоҷикистон дар роҳи пуштибонӣ аз ташаббусҳои судбахши байналмилалӣ ва лоиҳаҳои стратегии зербиноии кишвар, аз ҷумла дар самти рушди гидроэнергетика, имрӯз дар минтақа ва ҷаҳон мавриди дарки дуруст ва пазироию дастгирӣ қарор мегиранд.
Дар ҳошияи Форуми ҷаҳонии иқтисодӣ миёни Ҷумҳурии Тоҷикистон ва Созмони амният ва ҳамкорӣ дар Аврупо Созишнома оид ба мақоми Дафтари созмон дар Тоҷикистон ба имзо расид. Аз ҷониби Тоҷикистон ба созишнома вазири корҳои хориҷӣ Ҳамроҳхон Зарифӣ имзо гузошт.
Як созишномаи дигар миёни Кумитаи миллии олимпии Тоҷикистон ва Кумитаи олимпии Австрия ба имзо расид. Ба он аз ҷониби Тоҷикистон раиси Кумитаи ҷавонон, варзиш ва сайёҳӣ, ноиби президенти Кумитаи миллии олимпӣ Маликшо Неъматов имзо гузошт.
Баёни ақида (0) Санаи нашр: №: Мутолиа карданд: 2075
