маориф
СУҒД: ҷамъияти "Дониш" фаъолияташро густариш мебахшад
Дар гузаштаи начандон дур ҷамъияти "Дониш" як иттиҳодияи нерӯманд ба ҳисоб мерафт ва дар Тоҷикистон ҳам фаъолияти густурдае дошт. Ҳадафаш тарғиби маърифати сиёсию иқтисодӣ, комёбиҳои илму техника, фарҳанг ва таҷрибаи пешқадам, инчунин тарбияи маънавии одамон буд.
Он соли 1947 ба ибтикори зиёиёни пешқадами кишвар бо номи Ҷамъият оид ба паҳн кардани донишҳои сиёсӣ ва илмӣ ташкил ёфт ва соли 1963 номи "Дониш"-ро гирифт.
Ҳар шаҳрванде, ки тарғиботи донишро ба зима мегирифт, узви ҷамъияти "Дониш" шуда метавонист. Фаъолияти он ихтиёриву бемузд ва бо ташаббуси шахсии аҳли илму зиё ба хотири дар ҷомеа паҳн кардани навгониҳои илму дониш сурат мегирифт. Академикҳо Ғ. Алиев, М. Турсунзода, А. Баҳоваддинов, С. Раҷабов, М. Осимӣ раисии раёсати ҷамъияти "Дониш"-ро ба зимма доштанд.
Соли 1976 наздики 26 ҳазор олиму муаллими мактабҳои олию миёна, табибон, кормандони муҳандисию техникӣ, иқтисодчиён, мутахассисони соҳаҳои кишоварзӣ ва саноат, ҳуқуқшиносон, зиёиёни эҷодкор, ихтироъкорону навоварон ва пешқадамони истеҳсолот узви он буданд. Барои пешбарии корҳои илмию машваратӣ ва эҷодӣ дар назди раёсати ҷамъият ва ташкилотҳои маҳаллии он беш аз бист бахши илм ва ҳайатҳои мухталиф фаъолият доштанд.
Бо Истиқлолияти давлатии Тоҷикистон ин ҷамъияти бонуфуз умри дубора ёфт.
Дар роҳандозии фаъолияти он дар вилояти Суғд мақомоти иҷроияи ҳокимияти давлатии вилоят нақши назаррас дорад. Ва саъйи собиқ узви ҳайати таҳририяи рӯзномаи "Ҷумҳурият", олим ва публитсист, шодравон Карим Абдулов ҳам дар ин ҷода шоистаи ёдоварист.
Чанде пеш дар китобхонаи вилоятии ба номи Тошхоҷаи Асирии шаҳри Хуҷанд ҷаласаи навбатии ҷамъияти "Дониш" баргузор шуд.
Аз ҳисобот ва музокираҳои баррасишуда маълум гардид, ки фаъолияти ҷамъияти "Дониш" айни замон дар шароити созандагиву бунёдкориҳо баҳри ояндаи неки кишвар ба ҷомеа зарур аст. Иштирокдорони ҷаласа Ҷумъабой Сангинов, муовини аввали раиси вилояти Суғд, олим ва сиёсатмадори шинохтаро раиси ҷамъияти "Дониш"-и вилояти Суғд интихоб карданд.
Субҳон Ёдгорӣ, шаҳри Хуҷанд
Баёни ақида (0) Санаи нашр: №: Мутолиа карданд: 5588
