мулоқотҳо
Роҳбари нави Иттиҳоди Аврупо дар Тоҷикистон ба Президенти ҷумҳурӣ эътимоднома супурд
24 ноябр Президенти Ҷумҳурии Тоҷикистон Эмомалӣ Раҳмон аз Роҳбари нави намояндагии Иттиҳоди Аврупо дар Тоҷикистон Норбер Жустен эътимоднома қабул намуд.
Дар сӯҳбати Сардори давлат Эмомалӣ Раҳмон бо Норбер Жустен, ки баъди супурдани эътимоднома сурат гирифт, масоили ҳамкории Тоҷикистону Иттиҳоди Аврупо баррасӣ шуд.
Сардори давлат Эмомалӣ Раҳмон аз густариши намоёни робитаҳои Тоҷикистон бо Иттиҳоди Аврупо ва кишварҳои аъзои он, дар маҷмӯъ, изҳори қаноатмандӣ карда, ҳамзамон таъкид бар он дошт, ки имкону захираҳои истифоданашудаи рушди ҳамкориҳо ҳанӯз хеле зиёданд.
«Иттиҳоди Аврупо шарики пешсафи Тоҷикистон дар таҳия ва татбиқи барномаю лоиҳаҳои гуногун барои дастгирии соҳаҳои маорифу тандурустӣ ва ҳифзи иҷтимоии аҳолӣ аст», - изҳор дошт Норбер Жустен ва афзуд, ки баҳри дастгирии сарҳадбонони тоҷик ва мусоидат ба таҳкими амнияту субот дар минтақа низ ҳамкориҳо рӯ ба густариш доранд.
Мусоҳибон оид ба рӯзномаи ҷаласаи навбатии Комиссияи муштараки ҳамкориҳо, ки дар шаҳри Душанбе ба кори худ оғоз мекунад, гуфтугӯ намуда, аз пайвастагии маҷлисҳои он изҳори қаноатмандӣ карданд.
Мубодилаи судманди афкор ҳамчунин оид ба роҳҳои таҳкиму густариши робитаҳои минбаъда ва дигар масоили мавриди таваҷҷӯҳ сурат гирифт.
Баёни ақида (0) Санаи нашр: №: Мутолиа карданд: 7544
