президент
Таваҷҷӯҳи Сарвари давлат ба корҳои ободонию созандагӣ
11 июл Эмомалӣ Раҳмон, Президенти Ҷумҳурии Тоҷикистон, бо масъулони Ҳукумати кишвар, Дастгоҳи иҷроияи Сарвари давлат ва раисони вилоятҳо машварати корӣ доир намуд.
Дар машварат Оқил Оқилов, Сарвазири кишвар, муовинони Сарвазир, аъзои Ҳукумат, роҳбари Дастгоҳи иҷроия ва мушовирони давлатии Президент, роҳбарони идораҳои назди Ҳукумат ва як қатор корхонаю муассисаҳо ва раисони вилоятҳо иштирок намуданд.
Доир ба мавзӯи асосии машварат - ҷамъбасти пешакии натиҷаҳои рушди иҷтимоию иқтисодии кишвар ва иҷрои буҷети давлатӣ дар нимсолаи якуми соли равон гузоришҳои Фарух Ҳамралиев, вазири рушди иқтисод ва савдо, Сафаралӣ Наҷмиддинов, вазири молия, Шералӣ Гул, вазири энергетика ва саноат, Қосим Қосимов, вазири кишоварзӣ, Қодири Қосим, раиси Вилояти Мухтори Кӯҳистони Бадахшон, Қоҳир Расулзода, раиси вилояти Суғд ва Ғайбулло Афзал, раиси вилояти Хатлон, шунида шуданд.
Раисони вилоятҳо ҳамчунин доир ба ҷамъоварии ҳосили мева, ғалладонагиҳо, сабзавоту полезӣ, хӯроки чорво, дигар зироатҳо ва рафти кишти такрорӣ дар заминҳои обӣ ахбор доданд.
Эмомалӣ Раҳмон, Сарвари давлат, ба масъулони дахлдор доир ба рушди бонизоми иқтисоди кишвар, баланд бардоштани нишондодҳои истеҳсолӣ, муҳайё намудани ҷойҳои нави корӣ ва таъмини фаровонӣ дар бозори истеъмолии кишвар супоришҳои мушаххас дод.
Таваҷҷӯҳи зиёд ҳамчунин ба вусъати корҳои ободонию созандагӣ, омодагии ҷиддӣ ба мавсими тирамоҳу зимистони солҳои 2011-2012, дар сатҳи баланди ташкилӣ омода кардани тантанаҳои бахшида ба таҷлили солгарди 20-умини Истиқлолияти давлатии Тоҷикистон, аз ҷумла чорабиниҳои оммавии фарҳангию варзишӣ, зоҳир гардид.
Аз мардуми саховатпеша даъват карда шуд, ки дар рӯзҳои моҳи шарифи Рамазон, иди саиди Фитр ва таҷлили 20 - солагии Истиқлолияти давлатии Тоҷикистон ба табақаҳои ниёзманди аҳолӣ, пеш аз ҳама ятимону бепарасторон, маъюбон, пирону барҷомондагон ва оилаҳои камбизоат, дасти ёрӣ дароз намоянд.
Баёни ақида (0) Санаи нашр: №: Мутолиа карданд: 3591
