маориф
Маблағи шартнома даҳ дарсад афзуд
Маҳмадюсуф Имомов, ректори Донишгоҳи славянии Русияву Тоҷикистон, дар нишасти матбуотӣ зикр намуд, ки дар муассисаи таълимӣ чор ҳазор нафар донишҷӯ таҳсил дошта, имсол дар чор факулта аз рӯи ҳашт ихтисос 871 нафар ба гурӯҳҳои буҷетию шартномавӣ қабул мешавад. Аз ин шумора таҳсили 543 нафар донишҷӯ аз ҳисоби буҷети давлат аст.
Маблағи шартнома вобаста ба ихтисос (рӯзона) аз як ҳазору 490 сомонӣ то 5 ҳазору 940 сомонӣ ва дар шӯъбаи ғоибона аз як ҳазору 240 сомонӣ то чор ҳазору 460 сомонӣ пешбинӣ гардидааст. То имрӯз қариб чорсад довталаб ҳуҷҷат супурдааст, ки нисбат ба ҳамин давраи соли гузашта ду баробар зиёд мебошад. Соли 2011 931 нафар донишгоҳро хатм карда, 120 донишҷӯ дипломи сурх гирифт. Китобхонаи донишгоҳ дорои 98 ҳазор нусха китоб, аз ҷумла 15 ҳазор китоби электронист. Ҳамчунин марказҳои компютерӣ, технологияи иттилоотӣ ва омӯзиши фосилавӣ дар хизмати донишҷӯёнанд. Синфхонаҳо бо 480 компютер муҷаҳҳаз буда, ҳама факултаю кафедраҳо бо шабакаи интернет пайвастанд. Дар назар аст, ки имсол шӯъбаи рӯзноманигорӣ, риёзиёти олӣ ва маданиятшиносӣ ба усули таҳсили кредитӣ мегузаранд.
Дар посух ба суоли хабарнигор зикр шуд, ки пардохти маблағ дар гурӯҳҳои шартномавӣ даҳ дарсад афзудааст.
Убайдуллоҳи МУРОД
Баёни ақида (0) Санаи нашр: №: Мутолиа карданд: 5412
