сафарҳо
Дар мавзеи баландкӯҳ вазнгирии шабонарӯзии чӯҷаҳо ду баробар зиёд аст
Нимаи дуюми рӯзи 8 август сафари кории Эмомалӣ Раҳмон, Президенти кишвар, дар ноҳияи Мӯъминобод идома ёфт.
Дар ин ноҳия Президенти кишвар нахуст бо фаъолияти корхонаи парандапарварӣ аз наздик шинос шуд.
Зимни боздиди Сарвари давлат иттилоъ дода шуд, ки чӯҷаҳои гӯштии ин корхона дар 45 рӯз 2- 2,5 кг вазн гирифта, барои забҳ омода мешаванд. Ҳоло дар корхона 13800 сар мурғи гӯштӣ барои забҳ омода аст ва ҳар рӯз аз ин ҷо аз 800 то 1000 мурғ ё худ 2 тонна гӯшти парҳезии паранда ба бозор пешниҳод мегардад. Дар як моҳ 20 тонна гӯшт ба бозор меравад, ки баробар ба вазни сад сар чорвои калон аст. Аз ин хотир, Эмомалӣ Раҳмон, Сарвари давлат, таъкид дошт, ки бо зиёд кардани саршумори парандаи гӯштӣ метавон ба коҳиш додани забҳи чорво ва афзун намудани шумораи он мусоидат кард.
Месазад таъкид намуд, ки ба туфайли обу ҳавои мусоиди ноҳияи Мӯъминобод, чӯҷаҳои гӯштии ин корхона дар як шабонарӯз то 150 гармм вазн мегиранд, ҳол он, ки нишондоди миёнаи вазнгирии шабонарӯзии паранда дар ҷаҳон 80 грамм аст.
Ғайр аз ин 7,5 ҳазор чӯҷа парвариш меёбад. Ба иттилои роҳбарияти корхона, дар дастгоҳи чӯҷабарорӣ ё худ инкубатори он 63500 дона тухм гузошта мешавад ва аз 90 фоизи он чӯҷа мебарояд. Аҳли заҳмати корхона 8 мурғхонаро пурра тармиму омода карда, азм доранд, ки саршумори парандаро ба 150 ҳазор сар расонанд.
Эмомалӣ Раҳмон, Президенти кишвар, барои амалӣ шудани ин ҳадаф ба масъулон супориш дод, ки ба ин корхона заминҳои иловагӣ ва қарзи бонкии имтиёзнок ҷудо намоянд.
Дар ин корхона 62 нафар аз аҳолии маҳаллӣ бо кори доимӣ ва маоши хуб таъмин гаштааст. Роҳбари корхона бо ҳидояти Сарвари давлат ӯҳдадор шуд, ки ба ифтихори ҷашни 20 - умин солгарди Истиқлолияти давлатии Тоҷикистон ба маоши коргарон 150 сомонӣ илова кунад.
Дар ноҳияи Мӯъминобод бо иштироки Эмомалӣ Раҳмон, Сарвари давлат, як сардхонаи бузург, ки барои нигоҳдории 1000 тонна гӯшт ва меваю сабзавот пешбинӣ шудааст, мавриди баҳрабардорӣ қарор гирифт.
Дар маркази ноҳияи Мӯъминобод Эмомалӣ Раҳмон, Президенти кишвар, бо роҳбарияту фаъолон ва намояндагони сершумори мардуми ин ноҳияи кӯҳистон мулоқот намуда, ба суолу дархостҳои онҳо посух гуфт ва ба масъулони ҷумҳуриявию маҳаллӣ барои рафъи як қатор мушкилу монеаҳо супоришҳои мушаххас дод.
Баёни ақида (0) Санаи нашр: №: Мутолиа карданд: 2090