президент
Машварати кории Сарвари давлат
15 август Эмомалӣ Раҳмон, Президенти Ҷумҳурии Тоҷикистон, машварати корӣ доир намуд.
Дар машварат Оқил Оқилов, Сарвазири мамлакат, муовинони Сарвазир, аъзои Ҳукумат, Роҳбари Дастгоҳи иҷроия ва мушовирони давлатии Президенти Ҷумҳурии Тоҷикистон, Маҳмадсаид Убайдуллоев, Раиси шаҳри Душанбе, раисони ноҳияҳои пойтахт ва дигар шахсони масъул иштирок доштанд.
Дар машварат масоили вобаста ба таъмини фаровонӣ дар бозори истеъмолӣ, вусъати корҳои созандагию ободонӣ, омодагӣ ба таҷлили солгарди 20 - уми Истиқлолияти давлатии Тоҷикистон ва дастгирии табақаҳои ниёзманди аҳолӣ дар арафа ва рӯзҳои Иди саиди Фитр ва ҷашни истиқлол баррасӣ шуд.
Эмомалӣ Раҳмон, Сарвари давлат, ба масъулони дахлдор доир ба таъмини фаровонию арзонӣ ва тартибу низоми зарурӣ дар бозори истеъмолии кишвар супоришҳои мушаххас дод.
Дастуру ҳидоятҳо ҳамчунин доир ба омодагӣ ва таҷлили сазовори 20 - умин солгарди Истиқлолияти давлатии Тоҷикистон дода шуд. Таъкид гардид, ки "ҳамаи иду ҷашнҳо дар Тоҷикистон, чун анъана, ҳамқадам бо корҳои бунёдкорию созандагӣ ва ободонӣ мебошанд ва ин анъанаи накӯ бояд ба кори ҳамарӯзаи мо табдил ёбад, то ки як кишвари ободу шукуфон ва аз ҳар ҷиҳат рушдёфта дошта бошем".
Эмомалӣ Раҳмон, Сарвари давлат, роҳбарони тамоми сохторҳои давлатию ҷамъиятӣ ва ҳамаи шахсони сарватманду саховатпешаро ба дастгирии ятимону бепарасторон, маъюбону барҷомондагон, мискинону мусофирон, оилаҳои камбизоат ва ҳамаи ниёзмандон даъват намуда, таъкид дошт, ки "онҳо низ мисли ҳама бояд имкони бо шодию нишот истиқбол гирифтани иди саиди Фитр ва ҷашни солгарди 20 - уми Истиқлолияти давлатии Тоҷикистони азизро дошта бошанд".
Баёни ақида (0) Санаи нашр: №: Мутолиа карданд: 3645
