номаҳо
Шукри неъмати истиқлол мекунем
Ҳадаф аз муроҷиати мо, намояндагони кумитаи маҳаллаи ба номи Содирхони Ҳофизи шаҳри Хуҷанд, ба гӯшаи "Розу ниёз"-и "Ҷумҳурият" пеш аз ҳама изҳори сипос намудан ба мақомоти иҷроияи ҳокимияти давлатии шаҳру вилоят барои корҳои созандагиву бунёдкориашон мебошад, ки ба пешрафти сатҳи зиндагии мардум, осоиш ва ободии диёрамон мусоидат мекунад. Дар маҳаллаи мо марказҳои фарҳангиву саломатӣ бо симои наву замонавӣ аз нав эҳё гардида, дар хизмати мардум қарор гирифтанд.
Маркази вилоят-шаҳри бостонии Хуҷанд дар назари мо ҳар лаҳзаву ҳар соат сарсабзу хуррам ва гулафшону дилработар мегардад. Мумфарш шудани роҳҳои шаҳр тибқи талаботҳои ҷаҳонӣ, гузаронидани хати оби нӯшиданӣ, бунёди даҳҳо иншооти муосир худ гувоҳи таваҷҷӯҳи Сарвари давлат баҳри шукуфоии кишвари азизамон аст. Бо дастгирии мақомоти иҷроияи хокимияти давлатии шаҳр дар гузари мо хишти аввали Маркази фарҳангию фароғатӣ бо номи "Ҳоҷӣ Сайфиддин" гузошта шуд. Ба хотири сабукӣ бахшидан ба нафақахӯрон ин ҷо бахши Амонатбонк низ кушода шуд ва ҳоло ҳудуди 850-900 нафар пирон нафақаи худро дар вақташ, дар назди манзилҳои худ мегиранд. Ҳамаи ин ғамхориҳо, албатта, ба шарофати соҳибистиқлолии кишвари азизамон, сиёсати хирадмандонаи Эмомалӣ Раҳмон, Президенти мамлакат, мебошад.
Соли равон мулоқоти Қоҳир Расулзода, раиси вилоят, бо сокинони шаҳри Хуҷанд дар Боғи ботаникӣ, бо иштироки бевоситаи 4 ҳазор нафар сурат гирифт, ки дар давоми даҳсолаҳои охир чунин таҷриба набуд.
Ҳамчунин ҳар рӯзи шанбе, аз субҳи барвақт раиси шаҳр Содиқҷон Мирхолиқов даҳҳо нафар бошандагони маҳаллаҳоро қабул карда, арзи онҳоро мешунавад.
Мо, пирони рӯзгордида, ба шукргузорӣ аз ин неъматҳои истиқлол таманно дорем, ки диёрамон боз ҳам шукуфо ва мардум ҳамеша рӯзгори осуда дошта бошанд.
Бо эҳтиром аз номи Шӯрои маҳаллаи "Содирхони Ҳофиз": М. Расулов, С. Умаров, Н. Қосимов,
И. Шарифов, Э. Дадобоев, А. Ғаниев, А. Ҳошимов, И. Пӯлодов, Т. Козимов, М. Ғафуров, ҷамъ 20 имзо, шаҳри Хуҷанд
Баёни ақида (0) Санаи нашр: №: Мутолиа карданд: 4037
