номаҳо
Мусофирон ҳоли зор доранд
Дар баромадгоҳи шарқии шаҳри Кӯлоб, дар байни шоҳроҳи Кӯлоб -Қалъаихум ва бозори "Сомониён" истгоҳест, ки онро "Майда-чуйда" низ мегӯянд. Аз ин ҷо мусофирон ба тарафи Дарвоз, Даштиҷум, Тагноб ва Шӯрообод мераванд. Дар байни онҳо пирони барҷомонда, маъюбон, занону кӯдакон, маризон ва ғайраро дучор меоем. Агар бахтатон омад кунаду зудтар нақлиёте ёбед, аз азоби ин "истгоҳ" зудтар халос мешавед. Вагарна лозим меояд, ки дар фасли гармо соатҳои дароз зери офтоби сӯзони Кӯлоб ва дар фасли сармо зери барфу борони он интизори нақлиёт бошед. Агар пойҳоятон аз истодан ба дард оянд, дар тобистон дар болои бетони сӯзон ва зимистон дар болои барфу ях нишаста онҳоро "дам" медиҳед. Чунин ҳоли зори мусофирон беш аз 10 сол боз идома дорад. Ман вазъро ба роҳбарияти шаҳри Кӯлоб расонда будам. Онҳо дар посух гуфтанд, ки барои беҳбуди истгоҳ чора меандешанд. Вале аз байн 1,5 сол гузашта бошад ҳам, то ҳол вазъият чун пештара аст. Наход дар байни мардуми шаҳри Кӯлоб, ки бо меҳмоннавозию меҳмондӯстӣ машҳуранд, шахсе ёфт нашавад, ки дар ин истгоҳ се хараки чӯбӣ гузошта, болои онро пӯшонад, то мусофиронро аз азобу машаққат халос намояд? Ё худ идора, ташкилот ва муассисае набошад, ки ин кори савобро анҷом диҳад.
Мутаассифона, ин гуна ҳолати ногувор дар аксари шаҳру ноҳияҳои кишвар ба назар мерасад. Ва касе барои рафъи ин мушкилот чорае намеандешад.
Аламхон НУРМАДОВ,
нафақахӯр, сокини деҳаи Мулёби
ноҳияи Шӯрообод
Баёни ақида (0) Санаи нашр: №: Мутолиа карданд: 4562
