мулоқотҳо
Эмомалӣ Раҳмон Йорг Фриденро ба ҳузур пазируфт
27 августи соли 2011 Эмомалӣ Раҳмон, Президенти Ҷумҳурии Тоҷикистон, Йорг Фриден - директори иҷроияи Гурӯҳи Бонки ҷаҳониро ба ҳузур пазируфт.
Дар мулоқот масоили ҳамкории бисёрсола ва гуногунҷанбаи Тоҷикистон бо ин муассисаи бонуфузи молиявии ҷаҳонӣ баррасӣ шуданд.
Таваҷҷӯҳи асосӣ ба татбиқи босамари нақшаҳои дастгирии рушди иҷтимоию иқтисодии Тоҷикистон, аз ҷумла дар самти беҳсозии идораи иқтисоди кишвар, сиёсати молиявӣ, соҳаи энергетика, пуштибонӣ аз соҳибкории хусусӣ ва ғайра зоҳир шуд.
Бо қаноатмандӣ зикр гардид, ки аз соли равон ҳаҷми кӯмакҳои молиявии Бонки ҷаҳонӣ аз рушди иҷтимоию иқтисодии Тоҷикистон 25% афзуд ва минбаъд ҳар сол барои дастгирии буҷети давлатӣ ва дигар корҳо 60 миллион доллари амрикоӣ маблағҳои грантӣ ҷудо карда мешаванд.
Гуфтугӯйи судманд доир ба рафти корҳо барои асосноксозии иқтисодӣ-техникӣ ва омӯзиши таъсири экологӣ - иҷтимоии лоиҳаи бунёди нерӯгоҳи Роғун ва ҳамчунин доир ба ташкили бозори минтақавии фурӯши нерӯи барқ сурат гирифт.
Ҳар ду ҷониб ҳавасмандии худро ба таҳким ва густариши ҳамкории судбахш таъкид намуданд.
www.president.tj
Йорг Фриден, Директори иҷроияи Гурӯҳи Бонки ҷаҳонӣ, дар сӯҳбат бо хабарнигорон изҳор дошт, ки дурнамои равобити дуҷониба, таҳкими ҳамкориҳои судбахши Ҳукумати Тоҷикистон бо Бонки ҷаҳонӣ дар меҳвари гуфтугӯи ӯ бо Эмомалӣ Раҳмон, Президенти Ҷумҳурии Тоҷикистон, қарор гирифтааст. Мавсуф аз мулоқот бо Сарвари давлат истиқбол карда, афзуд, ки ин дидор барояш аҳамияти вижа дорад. Зеро дар ҷараёни он тавонистааст барномаи фаъолият ва назароти худро дар робита ба тавсеаи ҳамкориҳо ва ҷалби ҳарчи бештари сармоягузории ин ниҳоди бонуфузи молиявӣ ба иқтисодиёти Тоҷикистон мувофиқа созад.
Дар ҷараёни мулоқот рафти корҳои асосноксозии фанниву иқтисодӣ, омӯзиши таъсири эҳтимолии экологии Нерӯгоҳи барқи обии Роғун аз сӯи коршиносони Бонки ҷаҳонӣ баррасӣ гардидааст. Гуфта шуд, ки дар ҳоли ҳозир корҳои барқарорсозӣ дар нерӯгоҳ бо маром ҷараён дошта, пас аз эълони натиҷаи таҳқиқи коршиносон Тоҷикистон метавонад ба сохтмони он идома диҳад.
Бино ба гуфти Йорг Фриден, оид ба татбиқи босамари барномаҳои дастгирии рушди иҷтимоию иқтисодии Тоҷикистон, бахусус дар самти беҳтар намудани сиёсати молиявӣ, энергетика, дастгирии соҳибкории хусусӣ ва дигар масоили мавриди таваҷҷӯҳ низ табодули назар шудааст.
Зимнан Йорг Фриден аз сатҳи кунунии ҳамкориҳои дуҷониба изҳори қаноатмандӣ кард. Ӯ итминон дод, ки дар раъси намояндагии худ дар Бонки ҷаҳонӣ аз манофеи Тоҷикистон устуворона пуштибонӣ хоҳад кард.
Фирӯзи РАҲМОНИЁН,
"Ҷумҳурият"
Баёни ақида (0) Санаи нашр: 30.08.2011 №: 126-127 (21 942-943) Мутолиа карданд: 1263
