мулоқотҳо
Роберт Блейк ба мавқеи Тоҷикистон дар Осиёи Марказӣ баҳои баланд дод
3 декабри соли 2011 Эмомалӣ Раҳмон, Президенти кишвар, Роберт Блейк - ёвари котиби давлатии Иёлоти Муттаҳидаи Амрико оид ба масоили Осиёи Ҷанубӣ ва Марказиро ба ҳузур пазируфт. Дар мулоқот масоили мавриди таваҷҷуҳи ду мамлакат дар муносиботи дуҷониба ва мавзӯъҳои ҳамкории минтақавию байналмилалӣ баррасӣ шуданд.
Ҷонибҳо бори дигар омодагӣ ва ҳавасмандии устувори худро ба густариши робитаҳои мутақобилан судманд, пеш аз ҳама дар самти мусоидат ба барқарорсозии иқтисодиёту иҷтимоиёт ва ҳаёти осоишта дар Афғонистон таъкид намуданд.
Роберт Блейк ба мавқеи Тоҷикистон дар минтақаи Осиёи Марказӣ ва нақши он дар рушди ҳамкории минтақавӣ баҳои баланд дода, аз номи Ҳукумати Иёлоти Муттаҳидаи Амрико ба Эмомалӣ Раҳмон, Сарвари давлат ва мардуми кишвар барои мусоидати ҳамаҷониба ба эҳёи эътидолу низом дар Афғонистон арзи сипос намуд.
Доир ба густариши минбаъдаи ҳамкорӣ ва мусоидат ба рушди иқтисодиёти Афғонистон, аз ҷумла тавассути татбиқи лоиҳаҳои минтақавии зербиноӣ дар соҳаҳои нақлиёту коммуникатсия, энергетика, кишоварзӣ ва ғайра гуфтугӯйи судманд сурат гирифт.
Зарурати зиёд намудани истеҳсоли неруи барқ дар Тоҷикистон ва кашидани хати баландшиддати интиқоли неруи барқи КАСА - 1000 ба Афғонистону Покистон ва ҳамчунин сохтмони роҳҳои нави минтақавии оҳану мошингард ва ба ҳам пайвастани шабакаҳои энергетикию нақлиётии кишварҳои Осиёи Марказӣ ва Осиёи Ҷанубӣ таъкид гардид.
Аз ҳамкории дуҷонибаи сохторҳои низомӣ ва ҳифзи ҳуқуқи Тоҷикистону Амрико, ки ба таҳкими амнияту суботи минтақавӣ равона гаштааст, изҳори қаноатмандӣ шуд.
Дар мулоқот ҳамчунин масоили дигари мавриди таваҷҷуҳи ду кишвар баррасӣ ёфтанд.
Дар ин бора ба АМИТ "Ховар" аз Хадамоти матбуоти Президенти Ҷумҳурии Тоҷикистон иттилоъ доданд.
Баёни ақида (0) Санаи нашр: 5.12.11 №: 159-161 Мутолиа карданд: 1966
