президент
Корҳои барқарорсозии неругоҳи Роғун
идома доранд
Нимаи дуюми рӯзи 5 декабри соли 2011 Эмомалӣ Раҳмон, Президенти кишвар, доир ба рафти корҳои барқарорсозӣ дар мавзеи бунёди нерӯгоҳи Роғун машварати корӣ доир намуд.
Дар он доир ба рафти корҳои барқарорсозӣ ва омодагӣ ба идомаи сохтмони ин иншоот, истифодаи ҳадафмандона ва сарфакоронаи маблағҳои ҷудошуда, сифати корҳо ва ҳамкорӣ бо коршиносони байналмилалӣ оид ба ташхиси техникию иқтисодӣ ва иҷтимоию экологии лоиҳаи бунёди нерӯгоҳи Роғун ҳисоботи Оқил Оқилов, Сарвазири ҷумҳурӣ ва роҳбарони дигар сохторҳои марбута шунида шуд.
Эмомалӣ Раҳмон, Сарвари давлат, таъкид дошт, ки тамоми корҳои барқарорсозии иншооти қаблан бунёдёфта ва омодагӣ ба идомаи сохтмон бо сифати баланд ва дар ҳамкорӣ бо коршиносони ҷаҳонӣ анҷом дода шаванд. Бинобар таъкиди Президенти мамлакат, ҳар як бинокори иншооти тақдирсоз бояд баръало донад, ки ин нерӯгоҳ бояд садсолаҳо ба Тоҷикистон ва кулли минтақа хизмат кунад.
Таъкид гардид, ки принсипи шаффофият ва эътимодбахшӣ дар ташхиси байналмилалии техникию иқтисодӣ ва иҷтимоию экологии лоиҳа бояд пурра ва бечуну чаро риоя гардад.
Ба роҳбарони сохторҳои дахлдор дастур дода шуд, ки истифодаи босамар ва сариштакоронаи ҳар як сомонии маблағҳои буҷетӣ ва аз ҳисоби саҳмияҳои мардум ҷудошуда таҳти назорати доимӣ қарор гирад.
Баёни ақида (0) Санаи нашр: 10.12.11 №: 162 Мутолиа карданд: 3616
